Alls hafa 36 sjónvarpsstöðvar staðfest þátttöku í Eurovision í Búlgaríu á næsta ári. Ísland er ekki á listanum yfir þátttökulönd keppninnar.
Skipuleggjendur Eurovision hafa birt lista yfir þær sjónvarpsstöðvar sem taka þátt í Eurovision 2027, en þar er ekki að finna íslenska ríkisútvarpið, RÚV.
Alls hafa 36 almannaútvarpsstöðvar staðfest þátttöku í 71. Eurovision-keppninni, sem fram fer í borginni Burgas í Búlgaríu í maí næstkomandi. Samkvæmt tilkynningu skipuleggjenda munu þær senda fulltrúa fyrir tæplega 600 milljónir manna.
Ekki kemur fram í tilkynningunni hvort Ísland hafi tekið endanlega ákvörðun um að taka ekki þátt eða hvort ákvörðun liggi einfaldlega ekki fyrir. Ísland er þó ekki á birtum lista yfir þær stöðvar sem hafa staðfest þátttöku en 1. október síðastliðinn sagði RÚV frá því að meirihluti stjórnar RÚV hafi lagt fram bókun um að beina þeim tilmælum til útvarpsstjóra að hann tilkynnti EBU, Sambandi evrópskra sjónvarpsstöðva, að RÚV tæki ekki þátt í Eurovision nema Ísrael yrði meinuð þátttaka.
Spánn og Slóvenía ekki heldur búin að ákveða sig
Spænska sjónvarpsstöðin RTVE og slóvenska stöðin RTVSLO hafa heldur ekki ákveðið hvort þær taki þátt í keppninni. Evrópska útvarpssambandið, EBU, hefur veitt þeim frest fram í desember til að taka ákvörðun.
Eurovision 2027 fer fram í Arena Burgas í Búlgaríu og sér búlgarska ríkissjónvarpið, BNT, um framkvæmd keppninnar. Undanúrslit verða haldin 11. og 13. maí og úrslitakvöldið fer fram laugardaginn 15. maí.
Kanada tekur þátt í Eurovision í fyrsta sinn eftir að kanadíska ríkisútvarpið CBC/Radio-Canada varð fullgildur aðili að EBU í júlí 2026. Norður-Makedónía snýr jafnframt aftur í keppnina eftir fjögurra ára fjarveru.
Á þessu ári ákváðu fimm ríki að taka ekki þátt í keppninni í mótmælaskyni vegna þátttöku Ísraels í Eurovision en það voru utan Íslands, Írland, Spánn, Slóvenía og Holland.
