Sjötíu og fjögurra ára karlmaður í Flórída, sem er ákærður fyrir að hafa myrt konu og hlutað lík hennar í sundur, sagðist tilbúinn að játa sök ef hann fengi Philly cheesesteak-samloku í staðinn.
Robert Kessler kom fyrir Nick Nazaretian, dómara við héraðsdóm í Hillsborough-sýslu, í gær þegar val á kviðdómendum hófst í morðmáli hans. Málið tengist dauða Stephanie Crone-Overholt, 47 ára, árið 2021.
Dómarinn sagði Kessler að hann gæti játað sök án sérstaks samkomulags við ákæruvaldið og fengið lífstíðarfangelsi. Kessler hugsaði sig um í nokkrar sekúndur áður en hann svaraði:
„Ég skal gera það fyrir Philly cheesesteak, skammt af frönskum og Pepsi.“
Þegar dómarinn bað hann um að staðfesta tilboðið ítrekaði Kessler það og bætti við að samlokan yrði að vera með lauk og majónesi. Hann óskaði einnig eftir frönskum kartöflum og 20 únsum af papriku.
Kessler sagðist tilbúinn að ganga að þessu til að spara skattgreiðendum kostnað.
„Ég get augljóslega ekki gefið fólki mat fyrir að játa sök. Það væri rangt á þúsund vegu,“ svaraði dómarinn. „Ég get tryggt þér að þú fáir hádegismat í dag, en ég get ekki lofað þér hver hann verður.“
Síðar í myndbandinu spurði Kessler hvort hægt væri að halda áfram með val á kviðdómendum.
„Ég vil ekki játa sök. Veljum bara kviðdóminn. Ég vil þessa ostasamloku. Ef ég fengi hana gæti ég hugsað mér að ganga að þessu, en ég fæ hana ekki,“ sagði hann.
Ákærður fyrir morð og illa meðferð á líki
Samkvæmt embætti ríkissaksóknara Hillsborough-sýslu hefur Kessler ákveðið að verja sig sjálfur fyrir dómi. Hann er ákærður fyrir morð af fyrstu gráðu og illa meðferð á líki.
Sundurskornar líkamsleifar Crone-Overholt fundust í McKay-flóa í nóvember 2021 þegar fiskimenn komu auga á þær. Samkvæmt yfirlýsingu sem lögð var fram í málinu sögðust að minnsta kosti þrjú vitni hafa séð mann sem samsvaraði lýsingu á Kessler henda ruslapokum í flóann.
Crone-Overholt hafði dvalið hjá Kessler og dóttur hans nokkrum dögum áður en hún hvarf.
Dóttir Kesslers sagði síðar yfirvöldum að hún hefði séð hann rífast við Crone-Overholt áður en hún hvarf. Konan hefði jafnframt beðið hann um 200 dali til að geta farið á brott, samkvæmt gögnum málsins.
Réttarhöldin halda áfram í dag.
