Blaðamaðurinn Jonathon Klein hjá miðlinum RideApart fer fögrum orðum um Ísland eftir ævintýraferð um landið á vegum Ducati og Dainese. Klein tók þátt í svokallaðri Expedition Masters Iceland ferð og segir upplifunina hafa haft djúpstæð áhrif á sig.

Klein segir að frá því hann sneri heim hafi hann ítrekað staðið sig að því að horfa út um gluggann og láta hugann reika aftur til Íslands. Landið hafi á sérstakan hátt sest að í huga hans og vakið sterka löngun til frekari ævintýra.

„Enginn staður lítur út eins og á Íslandi. Að minnsta kosti ekki á jörðinni,“ skrifar Klein og bætir við að hann hafi notið hverrar sekúndu ferðarinnar.

Tilefni skrifanna er nýtt myndband frá Expedition Masters ferðinni þar sem Klein og ferðafélagi hans Damian fara yfir upplifunina. Klein segir myndbandið hafa vakið upp sterkar minningar og að hann hafi horft á það ítrekað frá birtingu.

Ferðin stóð yfir í fimm daga og var ekið við krefjandi aðstæður á Ducati DesertX V2 mótorhjólum. Að sögn Klein reyndust hjólin afar vel þrátt fyrir erfiða leið. Hann segir hópinn meðal annars hafa farið fram úr tveimur hópum á sérútbúnum torfæruhjólum sem glímdu við bilanir og sprungin dekk.

Á fimm dögum hafi aðeins komið upp tvö vandamál hjá þeirra hópi. Annars vegar hafi sprungið framdekk og hins vegar losnað útblásturskerfi á einu hjólanna. Klein gerir lítið úr síðarnefnda atvikinu og segir það jafnvel hafa gert hljóðið í hjólinu enn tilkomumeira.

Í skrifum sínum lýsir Klein með sterkum hætti minningunum frá Íslandi. Hann segist enn geta kallað fram tilfinninguna af lausum sandi undir hjólunum, köldu jökulvatninu og gróðrinum sem hann lá á eftir langan dag á ferð.

Áhrifin virðast ekki hafa dofnað eftir heimkomuna.

„Ef einhver myndi biðja mig um að fara aftur akkúrat núna myndi ég grípa dótið mitt og fara í næsta 14 tíma flug,“ skrifar Klein.

Hann gengur svo langt að lýsa því yfir að ferðin hafi breytt líf hans og hvetur aðra sem hafa tíma og fjárhagslegt svigrúm til að prófa slíkt ævintýri.

„Farðu og upplifðu ævintýri lífs þíns. Þú verður ekki fyrir vonbrigðum,“ segir Klein að lokum.