Olga Mur, fertug kona sem var krýnd Ungfrú Moskva á síðasta ári, hefur verið ákærð fyrir framleiðslu og dreifingu klámefnis.

Vladimír Pútín Rússlandsforseti hefur lengi gagnrýnt klámiðnaðinn harkalega, þrátt fyrir að hermenn hans hafi sjálfir orðið háðir klámsíðum og að stjórnvöld hafi meðal annars auglýst eftir fleiri hermönnum á vefsíðunni Pornhub.

Nú hefur lögfræðingnum fyrrverandi, sem síðar hóf feril sem klámstjarna, verið stefnt fyrir dómi vegna meintrar ólöglegrar klámframleiðslu. Hennar rétta nafn er Olga Zubkova.

Hún á að mæta fyrir héraðsdómstólinn í Meshchansky-hverfi Moskvu í dag, 28. október og hefur verið bannað að yfirgefa Rússland. Verði hún fundin sek gæti hún átt yfir höfði sér allt að sex ára fangelsi.

Ekki hefur verið upplýst hvaða gögn ákæruvaldið hefur undir höndum gegn henni.

Olga starfaði sem lögfræðingur í átta ár áður en hún skipti skyndilega um starfsvettvang og opnaði snyrtistofu. Síðar vann hún til verðlauna í tveimur fegurðarsamkeppnum, í Moskvu og Dúbaí.

Hún hefur verið gift tvisvar en er nú einhleyp og á tíu ára dóttur. Hún stýrir þáttum um sambönd og náin trúnaðarmál undir heitum á borð við Love Theory og Whispering with Olga Mur.

Rússnesk raunveruleikastjarna slapp við fangelsi eftir nektargöngu

Málið kemur upp á sama tíma og rússnesk raunveruleikastjarna hefur sloppið við fangelsisvist eftir að hafa gengið nakin um götur Moskvu.

Anastasia Bragina, 22 ára áhrifavaldur, var harðlega gagnrýnd af konu sem sögð er vera ástkona Pútíns. Hún var kölluð „siðspilltur ruslbloggari“.

Bragina hélt því hins vegar fram að uppátækið hefði verið í samræmi við „tilgang sálar hennar“. Hún sagðist vilja „losna undan öllum takmörkunum“ en var þess í stað handtekin.

Hin umdeilda stjarna, sem er þekkt fyrir djarft og ögrandi efni á netinu, var dæmd í þriggja ára skilorðsbundið fangelsi við dómstól í Moskvu í september.

OnlyFans-stjarna sektuð um 45 þúsund pund

Önnur rússnesk OnlyFans-stjarna slapp nýlega við fangelsisvist vegna framleiðslu og dreifingar kynferðislega grófs myndbandsefnis.

Sofya Vershinina, 21 árs, var þess í stað gert að greiða 45.000 punda sekt, jafnvirði um átta milljóna íslenskra króna, og henni bannað að nota internetið í þrjú ár.

Dómurinn hefur valdið miklu áfalli fyrir tekjur hennar af kynferðislegu efni á netinu.

Vershinina er ein fjölmargra fyrirsætna sem hafa verið ákærðar af rússneskum yfirvöldum eftir að Pútín hóf að herða aðgerðir gegn ört vaxandi klámiðnaði landsins.

Saksóknarar segja hana hafa þénað 300.000 pund, jafnvirði rúmlega 50 milljóna íslenskra króna, með sölu á klámmyndböndum. Hún hafi einnig selt náið efni í gegnum samskiptaforritið Telegram á meðan hún bjó í lúxusíbúð á efstu hæð skýjakljúfs í Moskvu.