Nokkur erill var hjá lögreglunni á höfuðborgarsvæðinu í gærkvöldi og í nótt. Meðal verkefna voru líkamsárás, innbrot, hótanir unglinga og ógnandi hegðun manns sem var handtekinn.

Lögreglu barst tilkynning um óvelkominn einstakling í húsi í póstnúmeri 105. Samkvæmt dagbók lögreglu sýndi viðkomandi ógnandi hegðun. Hann var handtekinn og fluttur á lögreglustöð þar sem rætt var frekar við hann.

Í póstnúmeri 108 var lögregla kölluð að verslun vegna tilkynningar um afbrigðilega hegðun einstaklinga í bifreið. Málið var afgreitt á vettvangi samkvæmt verklagi lögreglu. Þá var tilkynnt um innbrot í póstnúmeri 101. Ekki koma fram frekari upplýsingar um innbrotið í dagbók lögreglu.

Unglingar sagðir hafa haft í hótunum

Lögregla fékk einnig tilkynningu um hópamyndun unglinga við félagsmiðstöð við grunnskóla í Kópavogi. Samkvæmt dagbókinni höfðu unglingarnir í hótunum. Ekki kemur fram hvort gripið hafi verið til frekari aðgerða vegna málsins.

Í Kópavogi var lögreglu jafnframt tilkynnt um geltandi hunda.

Tilkynning barst einnig vegna aðfinnsluverðs háttarlags einstaklinga í Garðabæ.

Handtekinn eftir líkamsárás

Alvarlegasta málið sem kemur fram í dagbókinni var tilkynning um líkamsárás í íbúð í Breiðholti

Einn einstaklingur var handtekinn vegna málsins og vistaður í fangageymslu lögreglu.

Auk þessara mála sinntu lögreglumenn ýmsum umferðarmálum á höfuðborgarsvæðinu í gærkvöldi og nótt.