Það verður notaleg bókmenntastund á Borgarbókasafninu Klébergi mánudaginn 2. nóvember þegar Sunna Dís Másdóttir, rithöfundur og fyrrverandi bókmenntagagnrýnandi Kiljunnar, les upp úr nýrri skáldsögu Margrétar Bjarnadóttur, Varkár.
Varkár er fyrsta skáldverk Margrétar en hún hefur áður sent frá sér þrjár bækur af öðrum toga. Nýja bókin virðist hafa hitt í mark hjá lesendum því hún er þegar uppseld á landinu.
Í lýsingu bókaútgáfunnar Benedikts segir að Varkár fjalli um þrána eftir því að eignast barn og tilveruna sem bíður ekki eftir neinum. Sagan er sögð í stuttum brotum þar sem minningar, hversdagsleg augnablik, ást og missir fléttast saman. Útkoman er sögð bæði átakanleg og á köflum óþægilega fyndin.
Margrét er ekki eingöngu rithöfundur heldur einnig fjöllistakona og danshöfundur.
Sunna Dís mun lesa úr bókinni á Klébergi og að upplestrinum loknum gefst gestum tækifæri til að staldra við, spjalla saman og njóta stundarinnar.
Viðburðurinn hefst klukkan 16 og stendur til 17. Aðgangur er ókeypis og allir velkomnir á meðan húsrúm leyfir.
