Brjóstaskimun hjá einkennalausum konum gegnir enn mikilvægu hlutverki við að greina brjóstakrabbamein snemma þrátt fyrir miklar framfarir í greiningu og meðferð sjúkdómsins.
Þetta kemur fram í grein sem Anna Kristín Höskuldsdóttir brjóstaskurðlæknir, Helga Tryggvadóttir krabbameinslæknir, Inga Reynisdóttir náttúrufræðingur, Ólöf Kristjana Bjarnadóttir krabbameinslæknir og Þórður Tryggvason meinafræðingur skrifa á Vísi fyrir hönd stjórnar Íslenska brjóstakrabbameinshópsins.
Í greininni kemur fram að tilfellum brjóstakrabbameins á Íslandi hafi fjölgað undanfarin ár. Á sama tíma hafi árangur meðferðar batnað og fleiri læknist eða lifi lengur með sjúkdóminn. Brjóstakrabbamein sé þó enn næst algengasta dánarorsök kvenna vegna krabbameina hér á landi.
Höfundarnir benda á að krabbamein sem greinist við skimun sé almennt minna og á lægra stigi en mein sem greinist eftir að einkenni koma fram. Snemmgreining geti jafnframt dregið úr þörf fyrir erfiðar lyfjameðferðir og umfangsmiklar skurðaðgerðir.
Þátttaka í brjóstaskimun hér á landi hafi lengi verið of lítil. Brjóstaskimun stendur konum á aldrinum 40 til 74 ára til boða þegar þær finna ekki fyrir einkennum frá brjóstum.
Í greininni er einnig fjallað um framfarir í einstaklingsmiðaðri meðferð, meðal annars notkun Prosigna prófsins sem metur áhættu á fjarmeinvörpum með greiningu á genum sem tengjast brjóstakrabbameini.
Höfundarnir segja spár gera ráð fyrir að tíðni brjóstakrabbameins á Íslandi aukist á næstu áratugum og hvetja konur til að mæta í skimun þegar boð berst.
