Steingrímur Ingi Björnsson, rafvirkjameistari, verslunarmaður og fyrrverandi landsliðsmaður í knattspyrnu, lést á hjúkrunarheimilinu Hlíð á Akureyri þriðjudaginn 13. október, 85 ára að aldri. Hann lést í faðmi fjölskyldu sinnar. Akureyri.net sagði frá andlátinu.
Steingrímur fæddist í Lyngholti í Glerárþorpi 26. júní 1941. Hann var einn af öflugum knattspyrnumönnum Akureyrar á sínum tíma og varð fyrsti leikmaður Þórs sem valinn var í íslenska A-landsliðið.
Steingrímur stundaði knattspyrnu frá unga aldri og lék með Þór og Íþróttabandalagi Akureyrar (ÍBA). Hann var þekktur fyrir hraða sinn sem framherji og lék með ÍBA í efstu deild á árunum 1958 til 1969. Á þeim tíma skoraði hann 41 mark í 73 leikjum.
Hann lék fjóra A-landsleiki fyrir Íslands hönd á árunum 1960 til 1962 og skoraði eitt mark. Það kom í 4:1 sigri Íslands á Hollandi á Laugardalsvelli árið 1961.
Eftir að leikmannaferlinum lauk lét Steingrímur áfram til sín taka í knattspyrnunni, meðal annars við þjálfun, dómgæslu og ýmis félagsstörf.
Steingrímur lærði rafvirkjun við Iðnskólann á Akureyri og lauk námi með meistarabréfi. Hann starfaði lengi við rafvirkjun en sinnti verslunarstörfum lengst af starfsævinnar.
Eiginkona Steingríms var Gunnur Gunnarsdóttir, fædd 1944. Þau gengu í hjónaband 10. september 1961 og eignuðust fimm börn: Rúnar, Höllu, Hörpu, Heiðu og Huldu. Barnabörnin eru fjórtán.
Foreldrar Steingríms voru Björn Árni Björnsson og Kristín Aðalsteinsdóttir. Systkini hans voru Kristbjörg, Jóhanna Kristín B. Austfjörð, Aðalsteinn og Kristbjörn, sem öll eru látin.
Útför Steingríms Inga fór fram frá Glerárkirkju í gær.
