Stór og sviðinn málmhlutur, sem talinn er mögulega vera brak úr geimskipi, hefur fundist á maísakri í Minnesota í Bandaríkjunum. Yfirvöld vinna nú að því að komast að uppruna hlutarins.

Bóndi fann hlutinn við uppskeru í dreifbýli í Stevens-sýslu 14. október. Hann er um 3,4 metrar í þvermál og bar greinileg merki þess að hafa orðið fyrir miklum hita.

Bóndinn telur að hluturinn hafi legið á akrinum í um sex vikur, miðað við ástand og vöxt maíssins undir honum. Raðnúmer fundust einnig á hlutnum og gætu þau hjálpað yfirvöldum að rekja uppruna hans.

Lögreglan í Stevens-sýslu hefur leitað aðstoðar ríkisstofnana og alríkisyfirvalda við að bera kennsl á hlutinn, finna eiganda hans og koma honum af akrinum. Ekki er talið að almenningi stafi hætta af honum.

Stjarneðlisfræðingurinn Jonathan McDowell telur mögulegt að um sé að ræða hluta úr kínverskri Zhuque-2E eldflaug. Efra þrep slíkrar eldflaugar fór inn í lofthjúp jarðar yfir Minnesota 15. september.

Flest geimbrak brennur upp í lofthjúpnum en stærri og hitaþolnir hlutar geta náð til jarðar. Yfirvöld hafa þó enn ekki staðfest að hluturinn í Minnesota sé geimbrak né hvaðan hann kom.