Sigurður Guðni Guðjónsson, lögmaður Margrétar Höllu Hansdóttur Löf, gagnrýnir aðstæður fanga á Hólmsheiði og segir fangelsið ekki henta til langvarandi vistunar. Hann telur jafnframt mikilvægt að horft verði til reynslunnar af Hólmsheiði við uppbyggingu fyrirhugaðs öryggisfangelsis í Árborg.
Margrét Halla hefur setið í gæsluvarðhaldi á Hólmsheiði frá 11. apríl 2025. Landsréttur staðfesti nýlega 16 ára fangelsisdóm yfir henni fyrir að hafa ráðið föður sínum bana á heimili fjölskyldunnar í apríl í fyrra og ráðist á móður sína.
Sigurður fjallar um aðstæður Margrétar Höllu í færslu á Facebook og segir dagana langa fyrir fanga á Hólmsheiði. Útivist sé takmörkuð, aðstaða til líkamsræktar bágborin og lítið sé um uppbyggilega vinnu eða afþreyingu.
„Mestur tími fanga fer í að horfa á hvíta veggi ganga og annarra rýma eða sjónvarp. Þetta umhverfi bætir ekki andlega heilsu fanga,“ skrifar Sigurður.
Hann gagnrýnir jafnframt hönnun fangelsisins og segir það líta vel út að utan en að reynslan af því sýni að leggja þurfi meiri áherslu á starfsemina innan veggja fangelsa.
„Fullyrða má að betra sé að eyða minna fé í umbúðir en meira fé í innihald þegar kemur að fangelsum og refsingum,“ skrifar hann.
Sigurður vísar þar til fyrirhugaðs öryggisfangelsis í Árborg, sem áætlað er að kosti um 30 milljarða króna. Hann telur hættu á að kostnaðurinn verði mun meiri þegar framkvæmdum lýkur og gagnrýnir að mikið virðist lagt upp úr útliti mannvirkisins.
Þá segir Sigurður að ýmis úrræði sem Fangelsismálastofnun hafi kynnt virðist ekki standa gæsluvarðhaldsföngum til boða. Hann segir meðal annars að erindi Margrétar Höllu um að fá að fara að Sogni, þar sem hún gæti notið meira frelsis, hafi ekki verið svarað.
