Fyrstu kynni geta haft mikil áhrif á hvernig fólk metur hvert annað og útlitið er aðeins einn þeirra þátta sem koma þar við sögu. Konur geta tekið eftir ýmsum atriðum hjá körlum nánast samstundis, meðal annars svipbrigðum, rödd, líkamstjáningu og framkomu.
Miðillinn En Pareja tók nýverið saman fimm atriði sem konur eru sagðar taka sérstaklega fljótt eftir hjá körlum. Tekið er fram að smekkur sé einstaklingsbundinn og því sé ekki um algilda uppskrift að aðdráttarafli að ræða.
1. Brosið
Bros og svipbrigði geta haft mikil áhrif á fyrstu kynni. Hlýlegt bros, augnsamband og svipur sem gefur til kynna áhuga getur gert einstakling aðgengilegri. Rannsóknir benda jafnframt til þess að bros og augu séu meðal þeirra andlitsþátta sem konur veita athygli.
2. Hvernig hann hugsar um útlitið
Dýr föt eða nýjustu tískustraumar skipta ekki endilega mestu máli. Hárgreiðsla, skegg, fatnaður og almenn snyrtimennska geta hins vegar mótað fyrstu sýn og gefið vísbendingar um persónulegan stíl.
3. Röddin
Röddin getur einnig haft áhrif á aðdráttarafl. Tónn, hrynjandi og hvernig maður tjáir sig geta skipt máli. Þá getur hæfileikinn til að tala skýrt, hlusta og sýna hinum aðilanum áhuga haft áhrif á fyrstu kynni.
4. Líkamstjáningin
Hvernig maður ber sig getur sagt ýmislegt áður en hann hefur sagt eitt einasta orð. Afslöppuð og opin líkamstjáning getur gefið til kynna sjálfsöryggi. Það þurfi þó ekki að birtast í yfirgangi heldur fremur öryggi og eðlilegri framkomu.
5. Húmorinn
Húmor getur einnig haft talsverð áhrif. Karl þarf ekki að segja brandara í sífellu en hæfileikinn til að fá aðra til að hlæja og halda uppi afslöppuðu samtali getur vakið athygli.
