Kieran Hayler, fyrrverandi eiginmaður bresku fyrirsætunnar Katie Price, hefur verið sýknaður af öllum ákærum um nauðgun og kynferðisbrot gegn 13 ára stúlku. Eftir dómsuppkvaðninguna sagðist hann hafa gengið í gegnum „fimm ára algjöra martröð“.
Hayler var ákærður fyrir þrjár nauðganir og eitt kynferðisbrot gegn stúlkunni í West Sussex árið 2016. Hann var einnig ákærður fyrir fjögur önnur brot sem vörðuðu kynferðisleg samskipti við barn. Dómurinn féll í Lewes Crown Court í dag og var Hayler sýknaður af öllum ákæruliðum.
Hann var sýnilega hrærður þegar dómarinn tilkynnti honum að hann mætti yfirgefa sakborningabekkinn.
Í yfirlýsingu fyrir utan dómshúsið, þar sem móðir hans stóð við hlið hans, þakkaði Hayler fjölskyldu sinni og vinum fyrir stuðninginn.
„Ég vil þakka vinum mínum og fjölskyldu sem hafa staðið með mér í fimm ára algjörri martröð. Ég er þakklátur kviðdómnum fyrir vandlega yfirvegun í þessu erfiða máli. Nú vil ég fá að vera í friði, endurbyggja líf mitt og verja tíma með fjölskyldunni,“ sagði hann.
Katie Price gaf vitnisburð gegn fyrrverandi eiginmanni sínum, sem er 39 ára, í réttinum í síðustu viku.
Dómarinn gagnrýndi vitnisburð Katie Price
Í niðurstöðu sinni lýsti dómarinn Price sem vitni sem lögmenn fyrri tíma hefðu kallað „hættulegt vitni“. Hann sagði hana hafa haft eigin hagsmuni af málinu og verið líklega til að segja eitthvað sem gæti haft óeðlileg áhrif á kviðdóminn, ef hún fengi tækifæri til þess.
Dómarinn sagði að það hefði líklega ekki komið í veg fyrir að sambærileg staða kæmi upp að nýju ef kviðdómnum hefði verið vikið frá og málið tekið fyrir aftur.
Þegar Price gaf fyrst vitnisburð kölluðu verjendur Haylers eftir því að kviðdómurinn yrði leystur frá störfum. Þeir sökuðu hana um að hafa vísvitandi reynt að eyðileggja réttarhöldin.
Lögmaður Haylers, Arlette Piercy, sagði í málflutningi sínum að vitnisburður Price hefði skapað „yfirþyrmandi flóð fordóma“ sem verjendur gætu ekki tekist á við.
Í yfirheyrslu kom fram að Price hefði sent stúlkunni skilaboð þegar hún var 14 ára. Þar sagðist hún hafa heyrt að Hayler og stúlkan hefðu kysst og að hann hefði „reynt við hana“.
Í öðrum skilaboðum spurði Price stúlkuna: „Kyssti hann þig? Ég ætla ekki að ræða þetta meira, mig langar bara að vita sannleikann.“
Í einu skilaboðanna sagði Price einnig: „Ég skal gera þig að lítilli stjörnu.“
Þegar lögmaður Haylers spurði hana út í þessi orð svaraði Price að um orðatiltæki væri að ræða og að engar annarlegar ástæður hefðu legið að baki þeim.
Síðar í yfirheyrslunni brást Price reiðilega við þegar lögmaðurinn sakaði hana um að ljúga um atburðarásina.
„Ég þarf ekki að vera hérna. Þið getið séð svart á hvítu að eitthvað hefur gerst. Ég ætla ekki að láta neinn kalla mig lygara,“ sagði hún.
Sagði ásakanirnar tengjast deilum þeirra
Vörn Haylers hélt því fram að ásakanirnar ættu rætur að rekja til deilna hans og Price. Þau skildu árið 2018 og gengu endanlega frá skilnaðinum árið 2021.
Saksóknarinn Ryan Richter spurði Hayler hvort deilur hans við Price væru í raun ekki það sem málið snerist um. Hayler svaraði: „Jú.“
Þegar saksóknarinn spurði hvort málið snerist um að hann hefði nauðgað stúlku svaraði Hayler: „Það hef ég ekki gert.“
Hayler sagði fyrir dómi að hann teldi Price og stúlkuna hafa hist til að samræma frásagnir sínar. Hann taldi einnig að stúlkan hefði verið að leika hlutverk í lögregluyfirheyrslu árið 2021.
Í lokaræðu sinni bað saksóknarinn kviðdóminn um að horfa fram hjá stórum hluta vitnisburðar Price.
„Þið hafið séð allt umrótið sem fylgir Katie Price og þurfið að meta hvaða áhrif hún hefur á málið og hversu mikið vitnisburður hennar hjálpar ykkur við að taka ákvörðun,“ sagði hann. Hann bætti við að kviðdómurinn mætti leggja allt að 90 prósent vitnisburðar hennar til hliðar, þar sem hann væri ekki viðeigandi fyrir málið.
Verjandi Haylers sagði skjólstæðing sinn hafa verið samkvæman sjálfum sér og skýran í framburði sínum. Hún hvatti kviðdóminn til að vera yfirvegaðan og rökvísan og sagði að tilfinningar væru óvinur skynseminnar. Hún benti jafnframt á ósamræmi í framburði stúlkunnar, sem hefði oftar en 30 sinnum sagst ekki vita eða muna eftir tilteknum atriðum.
Kviðdómurinn, sem skipaður var fjórum körlum og sex konum, ræddi málið í 14 klukkustundir og 55 mínútur áður en hann komst að þeirri niðurstöðu að sýkna Hayler af öllum ákærum.
