Lögregla gæti fengið heimild til að leggja tímabundið hald á bifreiðar sem notaðar hafa verið við utanvegaakstur, verði frumvarpsdrög sem birt hafa verið til kynningar í samráðsgátt að lögum.

Jóhann Páll Jóhannsson, umhverfis-, orku- og loftslagsráðherra, leggur þar til breytingar á náttúruverndarlögum. Auk viðbragða við utanvegaakstri fjalla drögin um landtöku farþega á friðlýstum svæðum og uppbyggingu innviða.

Tvær aðgerðir eru lagðar til gegn utanvegaakstri. Annars vegar geti Náttúruverndarstofnun látið lagfæra skemmdir á kostnað ökumanns og hins vegar geti lögregla lagt tímabundið hald á bifreið hans.

Markmiðið með tímabundinni haldlagningu er að stöðva utanvegaakstur þegar ökumaður hunsar fyrirmæli lögreglu, landvarða eða starfsmanna náttúruverndaryfirvalda og þjóðgarða. Einnig á heimildin að gera lögreglu kleift að koma í veg fyrir frekari náttúruspjöll hafi ökumaður þegar valdið tjóni.

Breytingarnar eru enn á kynningarstigi og umræddar heimildir hafa því ekki tekið gildi á grundvelli þessara frumvarpsdraga.