Anna Valdimarsdóttir sálfræðingur lést á Landspítalanum við Hringbraut 9. október, 78 ára að aldri.
Morgunblaðið greindi frá andláti hennar.
Anna lauk stúdentsprófi frá Menntaskólanum í Reykjavík og nam sálfræði og bókasafnsfræði við Háskóla Íslands. Síðar lauk hún cand. psych.-prófi frá Háskólanum í Ósló og stundaði framhaldsnám við University of Washington.
Anna opnaði sálfræðistofu árið 1982 og varð þekkt fyrir námskeið og fyrirlestra um sjálfstyrkingu, núvitund, samskipti og ástina. Hún kenndi jafnframt við Háskóla Íslands og Endurmenntun HÍ.
Anna skrifaði fjölmargar bækur og greinar og hlaut þýðingarverðlaun Reykjavíkurborgar árið 1974. Hún gegndi einnig fjölmörgum trúnaðarstörfum innan fagfélaga.
Anna lætur eftir sig þrjá syni, fjögur barnabörn og tvö langömmubörn.
