Bandaríska vélmennifyrirtækið Dimensional í San Francisco hefur auglýst eftir fólki til að ganga með vélhunda fyrirtækisins um götur borgarinnar. Launin eru 20 dollarar á klukkustund, aðeins 39 sentum yfir lágmarkslaunum í San Francisco.

Tilgangurinn er að safna gögnum sem nýtast við þróun gervigreindar sem á að gera vélmennunum kleift að athafna sig sjálfstætt við raunverulegar aðstæður. Gervigreindin á enn í erfiðleikum með að stjórna vélhundunum með nægilega áreiðanlegum hætti.

Dimensional auglýsti störfin í byrjun október og óskaði eftir fólki sem væri tilbúið að verja fjórum til sex klukkustundum í senn í að leiða fjórfættu vélmennin eftir fyrirfram ákveðnum leiðum um San Francisco.

Ekki er krafist reynslu af vélmennum. Starfsmenn þurfa hins vegar að vera með snjallsíma og geta meðhöndlað vélhundana, sem vega um 15 kíló. Ef vélmenni bilar eða ofhitnar gæti starfsmaður þurft að bera það aftur á skrifstofu fyrirtækisins.

Fyrirtækið útvegar vélmennin og býður upp á greidda þjálfun og öryggisleiðbeiningar.

Lágmarkslaun í San Francisco hækkuðu í 19,61 dollar á klukkustund 1. júlí síðastliðinn. Launin fyrir að ganga með vélhundana eru því aðeins 39 sentum hærri.