Finnst þér síminn stundum vita aðeins of mikið um þig? Eða að þú sért farinn að þjóna tækninni frekar en hún þér? Þá gæti samverustundin Mjúkt net á Borgarbókasafninu Grófinni verið eitthvað fyrir þig.
Miðvikudaginn 4. nóvember verður sjónum beint að stafrænu lífi okkar, persónuvernd og því hvernig hægt er að ná aðeins meiri stjórn á símanum og gögnunum sem við skiljum eftir okkur á netinu.
Anna Laufey Stefánsdóttir frá Stafrænni velferð verður á staðnum og veitir gestum ráðgjöf um ýmislegt sem tengist símanotkun. Þar má meðal annars nefna persónuverndarstillingar, aðgangsheimildir forrita og leiðir til að gera farsímanotkun öruggari.
Einnig verður kafað ofan í það sem gerist á bak við tjöldin þegar við notum stafræna miðla. Forrit og þjónustur safna ýmsum upplýsingum um hegðun notenda og geta út frá þeim dregið ályktanir um áhugamál, venjur og þarfir. Slíkt getur síðan haft áhrif á það sem birtist okkur á netinu.
Þeir sem vilja ganga enn lengra í að gefa símanum frí geta bókstaflega saumað utan um hann.
Emma Shannon frá hönnunarteyminu Endurtakk verður nefnilega á staðnum og aðstoðar gesti við að sauma eins konar svefnpoka fyrir símann úr Faraday efni. Efnið lokar fyrir símasamband þegar síminn er geymdur inni í pokanum.
Engin reynsla af saumaskap er nauðsynleg og því ættu jafnvel þeir sem hafa aldrei komið nálægt saumavél að geta sent símann í smá stafræna einangrun.
Mjúkt net fer fram á Borgarbókasafninu Grófinni alla miðvikudaga frá klukkan 16 til 18. Aðgangur er ókeypis og öll eru velkomin.
