Íþróttafréttamaðurinn Andri Már Eggertsson, betur þekktur sem Nabblinn, hefur ákveðið að láta af störfum á leikskólanum Baugi í Kópavogi eftir tæplega átta ára starf. Hann segir erfitt að kveðja vinnustaðinn og fólkið sem hann hefur kynnst þar.
Andri Már greindi frá ákvörðuninni í Facebook-færslu í dag þar sem hann þakkaði samstarfsfólki, foreldrum og börnum fyrir árin á leikskólanum.
Hann segir að starfið hafi upphaflega aðeins átt að vera tímabundið, í nokkra mánuði eftir útskrift úr fjölbrautaskóla. Það hafi þó fljótt komið í ljós hversu gefandi og skemmtilegt væri að vinna á leikskóla og nokkrir mánuðir hafi orðið að tæplega átta árum.
„Eftir svona mörg ár á frábærum vinnustað er erfitt að sleppa takinu og kveðja,“ skrifar Andri Már.
Hann rifjar meðal annars upp fyrsta vinnudaginn þegar hann kunni ekki að opna hliðið og klifraði því yfir grindverkið. Þá segist hann hafa séð fyrir sér að þrauka fram að sumri og finna sér annað starf.
Andri Már segist ekki geta mælt nógu mikið með því við karlmenn að prófa að vinna á leikskóla og nefnir sérstaklega hversu góður vinnustaður Baugur sé.
Ældi aðeins tvisvar við bleyjuskipti
Í færslunni fer Andri Már hlýjum orðum um samstarfsfólk sitt og sérstaklega leikskólastjórann Maggý, sem hann segir hafa reynst sér einstaklega vel.
Hann rifjar upp atvinnuviðtalið þar sem Maggý hafi trúað því að hann kynni að skipta á kúkableyjum.
„Ég lærði það og ældi bara tvisvar af þeim fjölmörgu bleyjum sem ég skipti á,“ skrifar hann í gamansömum tón.
Hann minnist einnig barnanna sem hann hefur sinnt í gegnum árin og segir þau ekki gefa neinn afslátt. Þau séu ófeimin við að benda honum á að hann sé að missa hárið og bíði spennt eftir því að verða stærri en hann.
Að lokum kveður Nabblinn með húmorinn að vopni. Hann biður vini sína um að senda sér tölvupóst fái þeir njálg eða lús, enda muni hann sakna þess að finna kláðann læðast að sér um leið og einhver nefnir að slíkt sé í gangi.
