ADHD getur haft margvísleg áhrif á parsambönd og meðal annars valdið misskilningi, pirringi og árekstrum. Sérfræðingar leggja þó áherslu á að með auknum skilningi, skýrari samskiptum og sameiginlegum venjum sé hægt að draga úr núningi og styrkja sambandið.
Mannlíf hefur tekið saman fimm hluti sem geta haft áhrif á sambandið
Gleymd skilaboð geta valdið misskilningi
Einstaklingur með ADHD getur lesið skilaboð, ákveðið að svara síðar en síðan gleymt því þegar athyglin beinist annað. Maki getur túlkað þögnina sem áhugaleysi eða afskiptaleysi þótt hún eigi sér allt aðra skýringu. Einföld ráð, á borð við stutt svar um að skilaboðunum verði svarað síðar og áminningu í símanum, geta komið að gagni.
Truflun og gleymska geta virst persónuleg
Gleymska, erfiðleikar með tímaskyn og athyglisbrestur í samtölum geta orðið til þess að maki upplifi sig hunsaðan eða vanmetinn. Á sama tíma getur einstaklingurinn með ADHD upplifað stöðuga gagnrýni vegna atriða sem hann á þegar erfitt með að stjórna. Sameiginleg dagatöl, áminningar og fastar venjur geta dregið úr slíkum árekstrum.
Tilfinningar geta orðið mjög sterkar
Ágreiningur getur reynst sérstaklega krefjandi þegar tilfinningar magnast hratt. Sumir með ADHD upplifa gremju, höfnun eða reiði af miklum styrk og þá getur orðið erfiðara að hlusta eða bregðast yfirvegað við. Sérfræðingar mæla með að pör komi sér fyrir fram saman um hvernig gera megi stutt hlé á erfiðum samtölum án þess að annað upplifi að það sé yfirgefið.
Of mörg ágreiningsefni geta flækt málin
Erfiðleikar með vinnsluminni geta gert flókin rifrildi sérstaklega erfið. Þegar gömul ágreiningsefni bætast við það sem upphaflega var rætt getur samtalið fljótt farið úr böndunum. Betra getur verið að halda sig við eitt umræðuefni í einu, skrá önnur atriði sem ræða þarf síðar og draga saman niðurstöðuna í lokin.
Sambandið þarf að henta báðum
Markmiðið ætti hvorki að vera að einstaklingurinn með ADHD þurfi að haga sér eins og hann sé ekki með ADHD né að makinn þurfi að sætta sig við alla erfiðleika án athugasemda. Heilbrigt samband byggist á því að báðir aðilar taki ábyrgð, tjái þarfir sínar og finni sameiginlegar leiðir til að draga úr fyrirsjáanlegum árekstrum.
Sambandið þarf þannig að mótast eftir þeim tveimur einstaklingum sem eru í því en ekki fyrirfram gefnum hugmyndum um hvernig „rétt“ parsamband eigi að líta út.
