Alls er áætlað að 35 vitni verði leidd fyrir Héraðsdóm Reykjaness í næstu viku við aðalmeðferð máls gegn Írisi Helgu Jónatansdóttur en Heimildin greinir frá þessu. Hún hefur verið ákærð fyrir umfangsmikið umsáturseinelti og fjölmörg önnur brot gegn alls níu brotaþolum.

Aðalmeðferð málsins hefst á mánudag og samkvæmt áætlun dómstólsins stendur hún yfir í að minnsta kosti fjóra daga. Gert er ráð fyrir að Íris Helga sitji ein fyrir svörum fyrsta daginn en vitnaleiðslur hefjist í kjölfarið.

Ákæran er 17 blaðsíður og ákæruliðirnir 68. Írisi Helgu er meðal annars gefið að sök umsáturseinelti, rangar sakargiftir, skjalafals, hótanir, ærumeiðandi aðdróttanir og brot gegn barnaverndarlögum.

Meint brot beinast að fullorðnum einstaklingum og börnum þeirra. Í ákærunni er meðal annars lýst hótunum um líkamsmeiðingar, íkveikju, skemmdir á bifreið og eitrun hunds. Þá er henni gefið að sök að hafa sent börnum skilaboð undir fölskum formerkjum og dreift röngum ásökunum.

Meint brot gegn sumum brotaþolanna eru sögð hafa staðið yfir árum saman. Málið vakti meðal annars athygli eftir að Garpur Elísabetarson og Sölvi Guðmundarson stigu fram og greindu opinberlega frá meintum ofsóknum Írisar Helgu.