Mikið var að gera hjá Slökkviliði höfuðborgarsvæðisins síðastliðinn sólarhring en alls bárust 129 útköll á sjúkrabíla. Þar af voru 58 skilgreind sem forgangsverkefni.

Dælubílar slökkviliðsins voru kallaðir út sjö sinnum á tímabilinu. Umfangsmesta verkefnið var vegna elds sem kom upp í íbúð á þriðju hæð fjölbýlishúss um klukkan 23 í gærkvöldi.

Mikill viðbúnaður var vegna brunans en íbúanum hafði tekist að komast út úr íbúðinni af sjálfsdáðum áður en slökkvilið kom á vettvang. Hann var í kjölfarið fluttur á bráðamóttöku til skoðunar.

Slökkvistarf gekk greiðlega og tókst slökkviliðsmönnum jafnframt að bjarga hundi íbúans af svölum íbúðarinnar. Ekki kemur fram í tilkynningu slökkviliðsins hversu mikið tjón varð vegna eldsins eða hver upptök hans voru.

Sérstaklega annasamt var hjá næturvakt slökkviliðsins. Hún sinnti alls 72 útköllum á vaktinni áður en hún lauk störfum í morgun.

Slökkvilið höfuðborgarsvæðisins greindi frá verkefnum síðasta sólarhrings í færslu á samfélagsmiðlum í morgun.