Brúðkaup 24 ára Kínverja, sem þekktur er á samfélagsmiðlum sem Xiao Xiao Xu, vakti gríðarlega athygli eftir að hann bauð ókunnugu fólki af netinu að fagna með sér og unnustu sinni.
Xu birti boðið 25. október en hann hafði áhyggjur af því að fáir myndu mæta. Hann missti föður sinn aðeins þriggja ára og móðir hans giftist aftur tveimur árum síðar. Amma hans tók þá að sér Xu og eldri bróður hans en hún lést þegar hann var sjö ára.
Xu og unnusta hans kynntust á netinu fyrir þremur árum. Hann hefur unnið ýmis störf, meðal annars í textílverksmiðju, við matarsölu og pakkasendingar, og hafði safnað um 25.200 Bandaríkjadala.
„Hún var tilbúin að vera með mér þegar ég átti ekkert,“ sagði Xu um unnustu sína.
Í fyrstu efaðist Xu um að ókunnuga fólkið sem svaraði boðinu myndi raunverulega mæta. Raunin varð önnur og var talið að um 20.000 manns hefðu þegar verið mættir daginn fyrir athöfnina
Fólk ferðaðist langar leiðir til að taka þátt og hjálpa til. Starfsmaður í brúðkaupsgeiranum ók í tólf klukkustundir til að aðstoða við skreytingar. Aðrir lánuðu bíla, færðu parinu heimilistæki eða buðust til að sjá um hárgreiðslu og förðun. Bóndi frá Sichuan mætti meira að segja með tvo nautgripi.
Mannfjöldinn varð svo mikill að yfirvöld fluttu hátíðarhöldin á menningartorg í Luowang og skipulögðu neyðarþjónustu og brunavarnir.
Mikið magn matar þurfti fyrir gestina. Yfirkokkurinn Jia Xionglu sagði að tvö tonn af kjúklingi hefðu verið notuð 29. október einum saman og um 50 eldunarstöðvar.
Nokkur hótel á svæðinu voru fullbókuð vegna brúðkaupsins. Ókunnugir gestir af netinu voru ekki látnir greiða hefðbundnar peningagjafir heldur var þeim boðið að taka þátt í hátíðarhöldunum án endurgjalds.
