Miklar umræður hafa skapast á samfélagsmiðlum um siðferði í fasteignaauglýsingum eftir að fasteignasalan Pálsson notaðist við tvær myndir sem voru gerðar með gervigreind. Hér á ekki við um tölvuteiknaðar myndir af ókláruðum húsum eins og margir kannast við heldur af íbúð sem hefur verið til í marga áratugi og til eru ljósmyndir af.

Auglýsingin sem um ræðir er ekki á söluskrá eins og er en hægt að er nálgast hana hér. Hvergi kemur fram í auglýsingunni að notast hafi verið við gervigreind.

Finnst notkunin ekki blekkjandi

„Það er til að sýna fram á að hlutir komist fyrir inn í henni, hún er tóm og tilbúin til afhendingar,“ sagði Edwin Árnason, fasteignasali hjá Pálsson, við Mannlíf þegar hann var spurður af hverju þetta hafi verið gert. „Þetta er fallegra en hafa þær tómar, þetta er ekki flókið.“

Edwin segir að þetta sé af og til gert með tómar eignir því íbúðir séu svo hrár án húsgagna.

„Við höfum öll okkar skoðanir á þessum hlutum,“ sagði fasteignasalinn þegar hann var spurður hvort þetta væri blekkjandi. „Mér finnst það ekki. Ég myndi ekki nota orðin „að blekkja“. Fólk er ekki að kaupa húsgögn, fólk er að kaupa íbúð. Það er bara verið að sýna möguleikann á rýminu.“

En nú fylgir parketið með og það er greinilega í miklu betra ástandi á gervigreindarmyndinni, er það ekki furðulegt?

„Það sést á hinum myndunum að parketið er ekki stórglæsilegt og einnig sést þetta þegar fólk kemur og skoðar. Það gera sér allir grein fyrir því sem koma og skoða eignina að parketið var ekki í lagi þannig að í allavega þetta skipti slapp það.“

Blaðamaður Mannlífs benti á að gervigreindarmyndin hafi verið aðalmyndin í auglýsingunni á fasteignavef Vísis og spurði um ástæðu þess.

„Þetta er fallegasta myndin að mínu mati,“ sagði Edwin. „Þú sérð að þetta er tölvugert. Það er algjörlega augljóst, finnst mér persónulega.“

Gervigreind verður tekin fyrir á fundi fasteignasala

Mannlíf ræddi við Grétar Jónasson, framkvæmdastjóra Félags fasteignasala, sem sagði að notkun á gervigreindarmyndum þarfnist ítarlegrar umræðu bæði í samhengi gagnvart lögum og siðaregla enda bjóði tæknin upp á ótrúlega hluti. Þá sagði hann að málið yrði rætt á stjórnarfundi félagsins í vikunni.

„Það er eflaust ekki hægt að koma í veg fyrir að gervigreind sé notuð í fasteignaauglýsingum en að okkar mati ætti að koma fram ef svo er,“ sagði Brynhildur Pétursdóttir, framkvæmdastjóri Neytendasamtakanna, við Mannlíf.

„Ef verið er að fiffa myndir er hugsanlega hægt að líta á það sem villandi markaðssetningu.“