Árið 2025 var þungt í heimi menningar, lista, íþrótta og stjórnmála, þar sem fjöldi ástsælla og áhrifamikilla einstaklinga kvaddi þetta líf. Fréttir af andláti þekktrar kvikmyndahetju, söngvara sem mótuðu tónlistarsöguna, vísindamanns sem breytti sýn heimsins á náttúruna og leiðtoga sem mótuðu samtímapólitík vöktu djúpa sorg og eftirtekt um allan heim. Hér fyrir neðan er samantekt um nokkra af þeim heimsþekktu einstaklingum sem létust á árinu og mörkuðu óafmáanleg spor í sínum greinum.
Rob og Michele Reiner
Leikstjórinn og leikarinn Rob Reiner og eiginkona hans, Michele, létust á tragískan hátt þegar sonur þeirra er talinn hafa ráðist á þau inni á heimili þeirra í Los Angeles og skorið þau á háls, eftir hörkurifrildi í jólaveislu Conan O'Brien. Lögreglan í Los Angeles rannsakar nú málið. Rob var 78 ára og Michele 70 ára.
Jimmy Cliff
Reggae-goðsögnin Jimmy Cliff lést á árinu, 81 árs að aldri. Eiginkona hans, Latifa Chambers, greindi frá andláti hans og sagði: „Það er með djúpri sorg sem ég tilkynni að eiginmaður minn, Jimmy Cliff, hafi yfirgefðið þennan heim eftir að hafa fengið flog og í kjölfarið lungnabólgu.“ Cliff var þekktur fyrir lög á borð við „You Can Get It If You Really Want“, „The Harder They Come“ og „Many Rivers to Cross“, sem öll komu fram í költmyndinni The Harder They Come frá 1972, þar sem hann fór með aðalhlutverkið. Þá söng hann einnig slagarana „I Can See Clearly Now“ og „Reggae Nights“.
Dick Cheney
Dick Cheney, 46. varaforseti Bandaríkjanna, sem gegndi embætti við hlið George W. Bush og var einn helsti hugmyndasmiður „stríðsins gegn hryðjuverkum“, lést 84 ára að aldri af völdum fylgikvilla tengdum lungnabólgu, hjarta- og æðasjúkdómum. Cheney átti áratugalangan feril í stjórnmálum; hann var kjörinn fulltrúi repúblikana í fulltrúadeild Bandaríkjaþings fyrir Wyoming og varð síðar starfsmannastjóri Hvíta hússins í tíð Gerald Ford forseta. Hann gegndi einnig embætti varnarmálaráðherra í stjórn George H.W. Bush áður en hann varð varaforseti sonar hans. Þegar Christian Bale hélt ræðu þegar hann hlaut Golden Globe verðlaun fyrir túlkun sína á Cheney í kvikmyndinni Vice, þakkaði hann Satan fyrir innblásturinn.
Diane Keaton
Diane Keaton, hin margverðlaunaða leikkona, leikstjóri og framleiðandi, lést á árinu 79 ára gömul. Slökkvilið Los Angeles brást við útkalli á heimili hennar og hún var flutt með sjúkrabíl á sjúkrahús, þar sem hún lést síðar. Ferill Keaton er einstaklega umfangsmikill og spannar verk eins og Something’s Gotta Give, First Wives Club, Father of the Bride, Annie Hall, The Godfather, Book Club, Baby Boom og fjölda annarra. Hún varð fyrst fræg á sjöunda áratugnum þegar hún lék í The Godfather og í samstarfi við Woody Allen.
Jane Goodall
Jane Goodall, heimsþekktur dýrafræðingur og brautryðjandi í rannsókn á simpönsum, lést á þessu ári, 91 árs gömul. Goodall var ein af fyrstu konunum í heiminum til að sérhæfa sig í rannsóknum á prímötum. Hún hóf feril sinn árið 1957 þegar hún heimsótti vinkonu sína í Kenía og hitti þar fornleifafræðinginn og mannfræðinginn Louis Leakey, sem varð leiðbeinandi hennar.
Robert Redford
Hinn goðsagnakenndi Óskarsverðlaunahafi, leikari og leikstjóri, Robert Redford lést á árinu, 89 ára gamall. Redford var einn ástsælasti kvikmyndagerðarmaður Hollywood um áratuga skeið, og lék í sígildum myndum á borð við Butch Cassidy and the Sundance Kid (1969), The Sting (1973), Three Days of the Condor (1975), All the President’s Men (1976) og The Natural (1984). Redford stofnaði einnig Sundance-kvikmyndahátíðina.
Giorgio Armani
Tískuiðnaðurinn missti eitt stærsta nafnið í bransanum er ítalski hönnuðurinn Giorgio Armani lést á árinu, 91 árs að aldri. Hann lést „friðsamlega“ heima hjá sér, umvafinn ástvinum. Ferill Armani, sem spannar yfir 65 ár, hófst á miðjum sjöunda áratugnum þegar hann starfaði hjá Nino Cerruti sem karlfatahönnuður og vakti þegar mikla athygli. Síðar vann hann sem verktaki fyrir ýmis tískuhús, en stofnaði eigið merki ásamt samstarfsaðilanum Sergio Galeotti í júlí 1975.
Hulk Hogan
Fjölbragðaglímugoðsögnin Hulk Hogan lést einnig árið 2025, 71 árs gamall, eftir hjartaáfall. Hogan umbreytti atvinnuglímu í fjölskylduskemmtun og náði til mun víðari hóps en íþróttin hafði áður gert. Leikrænn stíll hans átti stóran þátt í að gera glímu að gríðarvinsælu sjónvarpsefni. Hogan hóf hina svokölluðu „Hulkamania“ árið 1984 þegar hann sigraði Iron Sheik og varð heimsmeistari og almenningur setti upp hárbandið og yfirvararskeggið sem einkenndu hann og hélt tryggð við táknmyndina í áratugi.
Ozzy Osbourne
Rokksöngvarinn goðsagnakenndi Ozzy Osbourne lést á árinu, 76 ára gamall eftir glímu við Alzheimer. Ozzy var hvað frægastur sem söngvari Black Sabbath, hljómsveitar sem hann stofnaði í Birmingham árið 1968 ásamt Tony Iommi, Geezer Butler og Bill Ward. Dauði hans bar að aðeins vikum eftir að hann kom fram með Black Sabbath í síðasta sinn.
Michael Madsen
Leikarinn Michael Madsen, þekktur úr kvikmyndum á borð við „Kill Bill“, „Reservoir Dogs“ og „Donnie Brasco“, lést á heimili sínu í Malibu á árinu. Samkvæmt heimildum lögreglu barst Neyðarlínunni tilkynning og fannst Michael látinn þegar lögregluþjónar komu á staðinn. Talskona hans, Liz Rodriguez, staðfesti að hann hefði fengið hjartaáfall. Madsen lék einnig í „Thelma & Louise“, „Mr. Blonde“, „The Hateful Eight“ og „Once Upon a Time in Hollywood.“
Virginia Guiffre
Virginia Giuffre, sem opinberlega sakaði dæmda kynferðisbrotamanninn Jeffrey Epstein og Andrés prins um kynferðislega misnotkun, er látin, 41 árs að aldri, eftir sjálfsvíg. Giuffre var ein þeirra fyrstu sem stigu fram með ásakanir á hendur Epstein og sagði að hún hefði verið aðeins 16 ára þegar Ghislaine Maxwell, nú dæmd fyrir mansal, hefði dregið hana inn í víðtækt mannsalsnet.
Frans páfi
Frans páfi, 266. páfi kaþólsku kirkjunnar, lést eftir heilablóðfall og hjartabilun. Vatíkanið birti opinbert dánarvottorð þar sem fram kemur að hann hafi látist af völdum heilablóðfalls og óafturkræfrar hjartabilunar. Frans páfi, fæddur Jorge Mario Bergoglio í Buenos Aires árið 1936, tók við embætti árið 2013 og hóf umfangsmiklar umbætur í kirkjunni, meðal annars með nýrri stjórnarskrá hennar.
Val Kilmer
Leikarinn Val Kilmer, þekktur fyrir hlutverk sín í kvikmyndum á borð við „Top Gun“, „The Doors“ og fjölmörgum öðrum kvikmyndum, lést úr lungnabólgu á þessu ári. Hann greindist með æxli í hálsi árið 2014 og þurfti að gangast undir bráða meðferð árið 2015 vegna mikillar blæðingar í hálsi. Æxlið reyndist af völdum munnkrabbameins. Kilmer komst inn í hinn virta Juilliard-leiklistaskóla aðeins 17 ára gamall og lék meðal annars Hamlet á sviði áður en hann sló í gegn í kvikmyndinni „Real Genius“ árið 1985.
Gene Hackman og Betsy Arakawa
Leikarinn og tvöfaldi Óskarsverðlaunahafinn Gene Hackman, 95 ára, fannst látinn á heimili sínu í Santa Fe í Nýju-Mexíkó ásamt eiginkonu sinni, Betsy Arakawa, 65 ára og hundi þeirra. Hackman hlaut þrjú Golden Globe-verðlaun og Cecil B. DeMille-æviverðlaunin á ferli sínum. Hann og Arakawa, sem var klassískur píanóleikari, höfðu verið gift í 34 ár. Hackman lést vegna hjartasjúkdóms en hann hafði glímt við Alzheimer um nokkurt skeið. Betsy lést úr hantaveiru nokkrum dögum fyrr.
Marianne Faithfull
Söngkonan og lagahöfundurinn Marianne Faithfull er ein af þeim þekktu manneskjum sem lést á árinu. Hún varð heimsfræg á sjöunda áratugnum, söng meðal annars lagið „As Tears Go By“, sem Mick Jagger og Keith Richards sömdu og Rolling Stones tóku síðar upp, og var kærasta Jagger á tímabili, sem leiddi til skilnaðar hennar á þeim tíma. Önnur þekkt lög með henni voru „The Ballad of Lucy Jordan“ og „Broken English“.
Diogo Jota
Hinn portúgalski knattspyrnumaður Diogo Jota og bróðir hans, André Silva, létust sumarið 2025 í bílslysi í héraðinu Zamora á Spáni á leið sinni til Liverpool fyrir undirbúningstímabil. Jota hafði nýverið gengist undir minniháttar aðgerð á lungum í Porto áður en hann giftist. Knattspyrnulið hans, Liverpool FC, heiðraði Jota með því að leggja númer hans, 20, á hilluna. Hann var 28 ára er hann lést en bróðir hans 25 ára.
Komment