Lögreglan á höfuðborgarsvæðinu sinnti fjölbreyttum verkefnum í gærkvöldi og í nótt, þar á meðal umferðarlagabrotum, útköllum vegna ölvaðra einstaklinga og rannsókn á meintum innbrotstilburði.
Tveir ökumenn voru handteknir grunaðir um akstur undir áhrifum fíkniefna. Þá voru fjórir ökumenn kærðir fyrir of hraðan akstur og tveir fyrir að aka án gildra ökuréttinda. Einn einstaklingur var jafnframt kærður fyrir að fylgja ekki fyrirmælum lögreglu við vinnslu máls.
Lögreglu barst tilkynning um umferðarslys þar sem ökumaður hafði yfirgefið bifreið sína og farið af vettvangi. Haft var upp á manninum og virtist hann vera mjög ölvaður. Hann neitaði að blása í áfengismæli, var handtekinn og vistaður í fangaklefa í þágu rannsóknar málsins. Þá var einnig tilkynnt um árekstur þar sem ökumönnum voru afhent tjónaeyðublöð.
Nokkur útköll tengdust ölvuðum einstaklingum. Ofurölvaður einstaklingur í miðborg Reykjavíkur var ekinn heim af lögreglu. Þá var annar maður, sem fannst sofandi á götu í miðbænum, vakinn af lögreglu og gekk hann á brott af vettvangi.
Einnig var tilkynnt um mann sem sýndi starfsfólki spilavítis óviðeigandi hegðun. Honum var vísað af staðnum.
Lögreglu barst tilkynning um þjófnað á fartölvu í miðborginni og einnig um grunsamlegar mannaferðir í Vesturbænum. Þegar lögregla kom á vettvang voru viðkomandi aðilar farnir.
Þá var tilkynnt um meint yfirstandandi innbrot þar sem fólk átti að vera að reyna að komast inn í íbúð tilkynnanda. Lögregla mætti á vettvang og hafði afskipti af aðilum sem þar voru. Við aðgerðirnar dró lögreglumaður fram rafvarnarvopn og beindi því að einum einstaklingi, en ekki kom til beitingar þess. Við nánari athugun reyndist ekki um innbrot að ræða. Tilkynnandi málsins reyndist hins vegar eftirlýstur og var hann færður á lögreglustöð til skýrslutöku að lokinni úrlausn málsins á vettvangi.
