„Þá er Kringlan komin á feitan bannlista og bara takk kærlega O.J. & Kaaber fyrir EKKERT!!!!!!!!“ segir Stefán Sigfinnsson í opinberri færslu innan hópsins Sniðganga fyrir Palestínu.
Svala Jónsdóttir skrifar við færsluna: „Smáralind er hvort sem er betri.“
Orðrómar um tengsl við Ísrael hafa loðað við fyrirtækið árum saman og má rekja þá til tveggja meginaðstæðna:
Fyrrum forstjóri og einn stærsti einstaki hluthafi fyrirtækisins, Howard Schultz, er gyðingur og hefur lýst yfir persónulegum stuðningi við Ísrael. Persónulegar skoðanir hans endurspegla hins vegar ekki opinbera stefnu eða fjármagnsflæði fyrirtækisins sjálfs.
Árið 2023 í kjölfar stríðsins á Gasasvæðinu, birti stéttarfélag starfsmanna Starbucks færslu á samfélagsmiðlum þar sem sýndur var stuðningur við Palestínu. Starbucks kærði stéttarfélagið fyrir vörumerkjabrot þar sem færslan notaði nafn og merki fyrirtækisins án leyfis. Þessi viðbrögð Starbucks urðu til þess að margir aðgerðarsinnar túlkuðu það sem stuðning við Ísrael og hófu herferðir til að sniðganga keðjuna.
Starbucks opnar nýtt kaffihús í Kringlunni
Kaffihúsakeðjan Starbucks mun opna nýtt kaffihús í Kringlunni í september næstkomandi. Fyrirtækið Berjaya Coffee Iceland ehf., sem fer með sérleyfi vörumerkisins á Íslandi, hefur undirritað samning þess efnis við Reiti fasteignafélag, eiganda Kringlunnar.
Nýi staðurinn verður staðsettur á fyrstu hæð verslunarmiðstöðvarinnar, í 135 fermetra rými þar sem Kaffitár var áður til húsa. Framkvæmdir við breytingar á húsnæðinu munu hefjast á næstu dögum. Um er að ræða stærsta kaffihús keðjunnar hér á landi til þessa, en gert er ráð fyrir sætaskipan fyrir allt að 45 gesti í senn.
Þetta verður þriðja Starbucks-kaffihúsið sem opnar á Íslandi, en fyrir rekur Berjaya tvo staði í miðborg Reykjavíkur, á Laugavegi og Hafnartorgi. Að sögn forsvarsmanna félagsins er opnunin í Kringlunni liður í áformum um að auka aðgengi að vörumerkinu og mæta mikilli eftirspurn á íslenskum markaði.
