Björn Leví Gunnarsson, fyrrverandi þingmaður Pírata, er ekki sáttur við orð Daða Más Kristóferssonar, fjármálaráðherra Íslands.

Í viðtali við Berlingske ræddi Daði um Samherjamálið en fyrirtækið er sakað um að hafa greitt næstum þrjá milljarða í mútur til ráðamanna í Namibíu.

„Þetta er alvarlegt mál,“ segir Daði Már. „En spillingin er í Namibíu, ekki á Íslandi.“

Þau orð þykja þingmanninum fyrrverandi ansi undarleg.

„Þegar íslenskur aðili greiðir mútur þá er spillingin líka íslensk,“ skrifar Björn.

„Ég veit ekki hvað er flókið við að skilja það. Ég veit ekki alveg hvað þetta á að vera - einhvers konar þolendaspilling. Af því að stjórnvöld í Namibíu voru svo spillt að krefjast þess að fá greiddan pening til þess að redda gæðum - að sá sem greiðir múturnar sé bara þolandi í þeirri kröfu. Eins og valmöguleikinn "best að tilkynna þetta" sé ekki það sem eigi að gera í svona málum,“ heldur hann áfram.

„Þetta er ekki ásættanlega skoðun hjá fjármálaráðherra. Meðvirkni í besta falli.“