TikTok-áhrifavaldurinn Sara Gilson, 43 ára, var skotin til bana af eiginmanni sínum, Jeremiah „Shawn“ Duffey, 48 ára, sem svipti sig síðan lífi á heimili þeirra í Owasso í Oklahoma aðfaranótt föstudags. Lögregla rannsakar málið sem heimilisofbeldi og morð-sjálfsvíg (e. murder-suicide).
Lögregla var kölluð á vettvang skömmu eftir klukkan 23 eftir að neyðarlínunni barst símtal þar sem tilkynnt var um skothvelli. Þegar lögreglumenn komu á staðinn fundu þeir hjónin látin af skotsárum. Barn sem var inni á heimilinu hafði hringt í neyðarlínuna og heyrðist kona öskra og gráta í bakgrunni símtalsins.
Rannsóknarlögregla telur að Duffey hafi skotið eiginkonu sína til bana áður en hann beindi byssunni að sjálfum sér. Lögreglan segir enga hættu lengur steðja að almenningi en rannsókn málsins stendur enn yfir.
Gilson hafði fengið nálgunarbann á eiginmann sinn þann 10. júní sem gilti til 24. ágúst. Samkvæmt dómsúrskurði átti Duffey að halda sig í að minnsta kosti 100 metra fjarlægð frá eiginkonu sinni og yfirgefa sameiginlegt heimili þeirra.
Sama dag var einnig óskað eftir nálgunarbanni gegn Duffey af hálfu móður 15 ára stúlku sem hann hafði þjálfað í körfubolta. Þar var honum meðal annars gefið að sök að hafa sent stúlkunni óviðeigandi skilaboð, sýnt af sér óviðeigandi líkamlega snertingu og boðið þöggunargreiðslur.
Skömmu áður en skotárásin átti sér stað birti Gilson myndband á TikTok þar sem hún sakaði eiginmann sinn um að vera barnaníðingur. Myndbandið fór í mikla dreifingu og hefur verið horft á það meira en tíu milljón sinnum.
Í kjölfar andláts hennar hefur verið hrundið af stað söfnun fyrir tvö börn þeirra hjóna.
