Darrell Sheets, sem þekktastur var fyrir þátttöku sína í raunveruleikaþáttunum Storage Wars, er látinn, 67 ára að aldri. Samkvæmt upplýsingum frá lögreglunni í Lake Havasu í Arizona fannst hann látinn á heimili sínu aðfaranótt miðvikudags.
Lögregla var kölluð á vettvang um klukkan tvö um nótt eftir tilkynningu um látinn einstakling. Þar var Sheets úrskurðaður látinn á staðnum. Lík hans hefur verið flutt til réttarmeinafræðings í Mohave-sýslu til frekari rannsóknar. Fyrstu upplýsingar benda til þess að um sjálfsvíg hafi verið að ræða.
Sheets naut mikilla vinsælda sem einn af aðalpersónum Storage Wars, þar sem hann gekk undir viðurnefninu „The Gambler“. Eftir að hann hætti í þáttunum settist hann að í Lake Havasu, þar sem hann rak fornmunabúð undir heitinu „Havasu Show Me Your Junk“.
Árið 2019 var hann lagður inn á sjúkrahús eftir hjartaáfall og gekkst undir aðgerð í kjölfarið.
Í yfirlýsingu frá sjónvarpsstöðinni A&E segir að fráfall hans sé harmað og að hugur þeirra sé hjá fjölskyldu og ástvinum hans á þessum erfiðu tímum.
Sheets kom fram í alls 163 þáttum af Storage Wars og átti einnig innkomur í vinsælum spjall- og matreiðsluþáttum í bandarísku sjónvarpi.
Í þessari grein er fjallað um sjálfsvíg
Fólki með sjálfsvígshugsanir er bent á upplýsingasíma heilsugæslunnar s.1700, netspjallið heilsuvera.is, Hjálparsíma Rauða krossins s.1717, á netspjallið 1717.is og á Píeta símann s.552-2218. Þau sem misst hafa ástvin í sjálfsvígi er bent á stuðning í Sorgarmiðstöð s. 551-4141, upplýsingasíma heilsugæslunnar s.1700, netspjallið heilsuvera.is og á Píeta símann s.552-2218.
