Kántrígoðsögnin Willie Nelson hefur stigið fram í baráttunni gegn fyrirhugaðri uppbyggingu gagnavera í heimabæ sínum Abbott í Texas. Í yfirlýsingu sem hann birti á samfélagsmiðlum sínum, varar hann við því að slík mannvirki geti ógnað bæði landbúnaði, náttúru og lífsgæðum í dreifbýli.
Nelson segir að hann eigi enn heimili í Abbott þar sem hann geti notið kyrrðarinnar og stjörnubjartrar nætur.
„Ég ólst upp í Abbott og á þar enn heimili með ræktuðu landi þar sem ég get enn séð stjörnurnar á kvöldin. Nú þarf samfélagið okkar, líkt og svo mörg önnur, að berjast gegn því að gagnaver ryðji sér til rúms á landi okkar,“ skrifar hann.
Hann gagnrýnir harðlega áhrif sem slík mannvirki geti haft á nærumhverfið og segir íbúa ekki þurfa á þeim að halda.
„Það síðasta sem við þurfum er hávaðasamt gagnaver sem eyðir vatni og veldur ljósmengun, hvort sem það er nálægt bænum okkar eða annars staðar.“
Nelson segir að styrkur dreifbýlis Bandaríkjanna hafi aldrei byggst á stórum iðnaðarframkvæmdum heldur fólkinu sem þar býr.
„Styrkur dreifbýlis í Bandaríkjunum hefur aldrei byggst á stórum iðnaðarframkvæmdum. Hann byggist á kynslóðum fólks, víðáttumiklum opnum svæðum, staðbundnum fyrirtækjum og tengslum við landið,“ skrifar hann.
Hann varar jafnframt við því að uppbygging gagnavera geti grafið undan landbúnaði og afkomu bænda.
„Öll Bandaríkin eiga skilið ábyrga ráðstöfun náttúruauðlinda sem rænir okkur ekki ræktarlandi – þar sem sameiginleg matvælaframleiðsla okkar fer fram – né lífsviðurværi smærri fjölskyldubænda. Við þurfum ekki gagnaver sem eyðileggja umhverfið í kringum sig.“
Í lok yfirlýsingarinnar setur Nelson fram sterka aðvörun um mikilvægi þess að verja náttúruauðlindir landsins.
„Sá sem stjórnar mat og vatni stjórnar fjöldanum. Við skulum ekki stuðla að eigin hnignun eða afsala okkur stjórn á þeim auðlindum sem við erum háð í Bandaríkjunum, og þá sérstaklega í Abbott.“
Undanfarin misseri hefur uppbygging gagnavera víða í Bandaríkjunum mætt vaxandi andstöðu íbúa og umhverfisverndarsinna sem hafa lýst áhyggjum af mikilli orku- og vatnsnotkun þeirra, auk áhrifa á náttúru og nærliggjandi samfélög. Nelson er nú meðal þeirra þekktu einstaklinga sem hafa tekið afstöðu í þeirri umræðu.
