Blaðaljósmyndarinn Heidi Levine, sem starfar fyrir The Washington Post, varð fyrir hrottalegri árás landtökufólks á Vesturbakkanum. Þegar hún heyrði Benjamin Netanyahu, forsætisráðherra Ísraels, draga frásögn hennar í efa fannst henni það vera enn ein árásin á sig.
„Hann hefði alveg eins getað hrækt framan í mig og sparkað í rifbeinin á mér, rétt eins og hinir gerðu þennan dag,“ sagði hún í hlaðvarpi dagblaðsins Haaretz.
Forsætisráðherrann hafði sagt að „alvarlegum spurningum væri enn ósvarað“ um „staðreyndir málsins“. Jafnframt gaf hann í skyn að „200 Arabar og vinstrisinnaðir aðgerðarsinnar hefðu tekist á við um 40 ísraelsk ungmenni“.
Levine ræddi við þáttastjórnandann Allison Kaplan Sommer eftir að hafa legið á sjúkrahúsi vegna umfangsmikilla áverka sem hún hlaut í árásinni. Meira en þremur vikum eftir atvikið hefur enginn verið handtekinn og ekkert af eigum hennar, sem var stolið, hefur komið í leitirnar.
Í tilfinningaþrungnu viðtali sagði Levine árásina þá verstu sem hún hefði orðið fyrir á ferli sínum sem blaðaljósmyndari. Hún sagði „gyðinga-hryðjuverkamenn“ hafa ráðist á sig. Levine hefur fjallað um stríð og átök í Sýrlandi, Líbíu, Írak og Úkraínu.
Levine sagðist um árabil hafa fylgst með ofbeldi og hatursáróðri landtökufólks á Vesturbakkanum. Nú væri svo komið að fólk erlendis tengdi Ísrael fyrst og fremst við myndir af grímuklæddu landtökufólki sem réðist á fólk, jafnvel aldraðar konur, brytist inn á heimili, mölvaði rúður, grýtti fólk og reyndi að kveikja í húsum.
„Þeir hugsa ekki um Ísrael á annan hátt, sem er virkilega dökkur blettur á þessu landi,“ sagði Levine.
Rabbíni handtekinn eftir að hafa aðstoðað palestínska bændur
Í sama hlaðvarpi sagði rabbíninn Jill Jacobs, framkvæmdastjóri samtakanna T'ruah: The Rabbinic Call for Human Rights, frá því þegar hún var handtekin eftir að hafa tekið þátt í hópi bandarískra rabbína sem fór til Vesturbakkans til að aðstoða palestínska bændur við árlega ólífutínslu og vernda þá fyrir árásum.
Aðspurð um gagnrýni þess efnis að slíkir aðgerðasinnar ögri fólki og gefi öfgahægrimönnum í Ísrael tilefni til aðgerða sagði Jacobs mikilvægt að rabbínar og aðrir sem væru stoltir af gyðinglegum uppruna sínum og hefðu tengsl við landið tækju þátt í slíkri starfsemi.
„Það er mjög mikilvægt að rabbínar og aðrir sem eru stoltir af því að vera gyðingar, tengjast þessu landi, eru ekki and-zíonistar og styðja framtíð Ísraels við hlið palestínsks ríkis séu hér. Þannig sýnum við að við ætlum að grípa til aðgerða til að gera þetta mögulegt,“ sagði hún.
„Ísrael á að vera griðastaður gyðinga,“ bætti hún við. „Ekki aðeins griðastaður gyðinga sem hafa ákveðnar pólitískar skoðanir.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir