Íslendinganna sárt saknað

Margar íslenskar fjöl­skyldur sitja í sárum á Tenerife eftir að allir íslenskir ferða­menn voru reknir af eyj­unni í síð­asta mán­uði. Fjöl­skyld­urnar hafa lífs­við­ur­væri sitt af þjón­ustu við Íslend­inga og bíða spenntar eftir því að þeir fari að streyma aftur til þessa vin­sæla við­komu­staðar þjóð­ar­innar.

Föstu­dag­inn 20. mars fór síð­asta vélin með íslenska ferða­langa frá Tenerife til Íslands en þá viku höfðu íslensku ferða­skrif­stof­urnar skipu­lagt nokkrar neyð­ar­flug­ferðir frá eyj­unni spænsku í sam­ráði við Neyt­enda­stofu og íslensk ferða­mála­yf­ir­völd. Spænsk yfir­völd höfðu þá fyr­ir­skipað brott­flutn­ing allra ferða­manna frá Tenerife og í kjöl­farið lokað fyrir flug með ferða­menn til eyj­unnar. Nærri 400 þús­und erlendir ferða­menn þurftu því að stytta dvöl sína og halda til síns heima. Útgöngu­bann var síðan sett á og þeir fjöl­mörgu Íslend­ingar sem búa á Tenerife eru inni­lok­aðir heima hjá sér og bíða spenntir eftir að bann­inu ljúki. Þeir bíða þó ekki síður spenntir eftir því að íslenskir ferða­menn fjöl­menni aftur til eyj­unnar blóm­legu.

Óvíst með framhaldið

Enn sem komið er hafa íslensku ferða­skrif­stof­urnar ekki fellt niður flug­á­ætlun sum­ars­ins til Tenerife en plönuð eru nokkrar ferðir í viku í allt sumar. Þráinn Vig­fús­son, fram­kvæmda­stjóri ferða­skrif­stof­unnar Vita, segir öryggi far­þeg­anna ávallt haft í fyr­ir­rúmi og er sann­færður um að Íslend­ingar muni aftur flykkj­ast til eyj­unnar. „Varðandi þró­un­ina í sumar munum við bíða og sjá hvernig dregið verður úr tak­mörk­unum bæði hér­lendis og erlendis. Við lögum okkur að ástand­inu og fellum niður þær ferðir sem ekki er raun­hæft að hafa í sölu. Við höfum ávallt öryggi okkar far­þega í fyr­ir­rúmi og bjóðum öllum okkar far­þegum að end­ur­bóka og breyta bók­unum sínum án kostn­aðar,“ segir Þráinn.

„Það hefur gengið ágæt­lega að bóka vet­ur­inn á Tenerife og er nú þegar t.d. upp­selt í jóla- og ára­móta­ferð­ina okkar. Ég held að þegar ástandið lag­ast og fólk geti farið að ferð­ast aftur verði komin nokkur upp­söfnuð þörf hjá fólki að kom­ast í sól og hita. Þannig að við erum bjart­sýn á fram­tíð­ina og að ferða­lög verði áfram eitt­hvað sem fólk lætur eftir sér.“

Tómas Gestsson, fram­kvæmda­stjóri Heims­ferða, segir ferða­skrif­stof­una í start­hol­unum og beðið sé í ofvæni eftir að hægt verði að hefja flug til Tenerife á nýjan leik. „Við erum í raun að bíða eftir við­brögðum stjórn­valda. Upp­haf­lega vorum við að íhuga að byrja í maí, en það mjög ósenni­legt að það verði. Núna virð­ist staðan hér­lendis að vera batna mjög mikið, þannig að við erum enn þá að líta til sum­ars­ins en bíðum átekta. Þetta veltur ekki síður á því hvernig hlut­irnir þró­ast á Spáni á næstu dögum og vikum,“ segir Tómas.

Veit ekki hvað tekur við

Jóhann K. Krist­jáns­son hefur rekið hjóla­leigu og skoð­un­ar­ferða­fyr­ir­tæki á Tenerife og heldur úti vef­síð­unni www.toursandbikes.com

„Ef ég á að vera hrein­skil­inn þá veit ég bara ekki hvað tekur við. Það verður alveg fer­lega súrt ef land­inn kemur ekk­ert til okkar því það mun klár­lega ekki hjálpa til,“ segir Jóhann K. Krist­jáns­son sem rekið hefur hjóla­leigu og skoð­un­ar­ferða­fyr­ir­tæki á Tenerife frá því sum­arið 2018.
Jóhann hefur fram til þessa treyst mikið á við­skipti við íslenska ferða­menn og saknar þeirra mjög. Það sem gæti hjálpað til á árinu, að mati Jóhanns, er nýleg þjón­usta fyr­ir­tæk­is­ins við að selja miða í ýmsa afþr­ey­ingu og mik­ill vöxtur hefur verið þar, að hans sögn. „Kúnna­hóp­ur­inn er sífellt að stækka hjá okkur og það er jákvætt að hluti við­skipta­vin­anna eru erlendir ferða­menn. Núna er staðan bara þannig að maður þarf að hafa fyr­ir­tækið lokað og fram­haldið er mjög óljóst. Það er alveg óhætt að segja að við söknum Íslend­ing­anna,“ segir Jóhann.

Aðspurður von­ast hann til að kom­ast með fjöl­skyld­una til Íslands sem fyrst og ferð­ast inn­an­lands í sumar.
„Við reynum að sjá þetta þannig fyrir okkur að þetta sé ekki búið spil. Fjár­fest­ingin er svo sann­ar­lega gíf­ur­leg og maður er ekki til­bú­inn til þess að kasta því bara frá sér án þess að þrjóskast eitt­hvað við.“

Gæti tapað ævisparn­aðnum

Halla Birg­is­dóttir veit­inga­maður opn­aði veit­inga­stað­inn Bambú fyrir Íslend­inga á Tenerife síð­asta sumar.

„Þetta er auð­vitað mikið sjokk og rosa­lega erfitt and­lega. Ég er hrein­lega með allan ævisparn­að­inn undir og hef lagt allt mitt í þetta,“ segir Halla Birg­is­dóttir veit­inga­maður sem i síð­asta sumar opn­aði veit­inga­stað­inn Bambú fyrir Íslend­inga á Tenerife. Halla ótt­ast að fá til sín fáa sem enga Íslend­inga það sem eftir lifir árs­ins.

„Mér finnst hræði­legt að vera nýbúin að stofna fyr­ir­tæki og þetta er gríð­ar­leg fjár­fest­ing. Það hefur tekið mik­inn tíma og tekið mikið á að koma staðnum af stað. Ég var mjög sátt við við­tök­urnar og það var bjart fram undan. Síðan kom bara þessi skellur og óvissan er mjög óþægi­leg,“ segir Halla og ótt­ast að þurfa að fara aftur á byrj­un­ar­reit þegar ferða­þjón­ustan fer af stað á eyj­unni á nýjan leik.

„Ég sakna Íslend­ing­anna veru­lega mikið og mér hefur fund­ist ofboðs­lega gaman að vinna við þetta. Nú veit ég ekki hvort ég þurfi að byrja allt upp á nýtt við að koma staðnum á flug eða jafn­vel að finna upp alveg nýtt konsept fyrir annan kúnna­hóp. Við til­hugs­un­ina fæ ég hroll niður hrygg­inn en ég er engu að síður reynsl­unni rík­ari eftir þetta. Ég mun aldrei skella í lás, upp­gjöf er ekki í boði og ég skal ekki horfa upp á bát­inn minn sökkva.“

Snúa aftur með fyrsta flugi

Herdís Hrönn Árna­dóttir og Sævar Lúð­víks­son eru par og reka saman Íslend­inga­bar­inn Nostal­gíu á Tenerife.

Veit­inga­menn­irnir Herdís Hrönn Árna­dóttir og Sævar Lúð­víks­son reka Íslend­inga­bar­inn Nostal­gíu á Tenerife og hafa nú lokað staðnum í bili. Þau ætla að skella sér til Íslands við fyrsta tæki­færi og snúa aftur á bar­inn um leið og fyrstu Íslend­ing­arnir mæta.

„Við höfum það ágætt. Sumarið er róleg­asti tím­inn hjá okkur þannig að þetta kemur svo sem niður á skásta tím­anum upp á rekst­ur­inn. Ég er bjart­sýn­is­mann­eskja en ég sé ekki mögu­leika á að opna aftur fyrr en í fyrsta lagi í haust,“ segir Herdís Hrönn sem vonar að Íslend­ing­arnir hræð­ist ekki að sækja bar­ina þegar þeim verður aftur hleypt til Tenerife.

„Við vorum sem betur fer að klára okkar besta rekstr­arár og þökkum vel fyrir það. Fyrir vikið höfum við það mikið í bak­pok­anum að við náum að lifa þetta af. Það er fullt af föstum kostn­aði sem borga þarf. Við söknum Íslend­ing­anna mjög enda stærsti kúnna­hóp­ur­inn okkar og því er til­gangs­lítið að opna fyrr en þeir koma aftur. Óvissan um hvenær þeir koma er hins vegar erfið en það er alveg klárt að við ætlum ekk­ert að hætta.“