Skilur að fólk hiki við að sækja smáforritið

Víðir Reyn­is­son yf­ir­lög­reglu­þjónn ræddi vænt­an­legt smá­forrit sem mun auð­velda vinnu við smitrakn­ingu vegna útbreiðslu COVID-19 í morg­un­fréttum á Rás 1 og 2 í morgun. Víðir telur for­ritið muni koma sér vel þegar álagið á smitrakn­ing­arteymið eykst en skilur vel ef fólk hiki við að sækja það.

Víðir ræddi virkni for­rits­ins. Hann sagði að for­ritið fylgist með ferðum manna og ef ein­stak­lingur smit­ast þá er hægt að kalla eftir upp­lýs­ingum um hvaða símar voru í návígi við síma þess smit­aða og skila­boð verða send út. „Þá kemur texti eins og: „þú varst í návígi við smit­aðan ein­stak­ling og við óskum eftir að þú farir í sótt­kví.“ Og svo verður þessu fylgt eftir með sím­tali,“ sagði Víðir.

Sér­fræð­ingar hafa horft til ann­arra þjóða við gerð for­rits­ins að sögn Víðis. „Þá aðal­lega Singapúr. Líka Suður-Kóreu en þar eru menn að ganga miklu lengra á per­sónu­frelsi manna, sem við viljum ekki gera. Við munum fara ein­hvern milli­veg.“

Reiknar með að forritið verði tilbúið í næstu viku

Víðir skilur að sumt fólk sé hik­andi við að sækja for­rit sem rekur ferðir fólks.

„Ég fékk sjálfur smá hroll þegar ég sá kynn­ingu um hvernig þetta er gert í öðrum löndum. Í röngum höndum getur þetta höggvið nærri okkar per­sónu­vernd,“ sagði Víðir. Hann bætti við að Embætti land­læknis muni bera ábyrgð á for­rit­inu. Unnið verður eftir ítr­ustu reglum og kröfum um vinnslu á heil­brigð­is­upp­lýs­ingum að sögn Víðis.

„Við förum ekki af stað með þetta nema við séum full­vissuð um að þetta sé öruggt,“ sagði Víðir. Um leið og veiran er gengin yfir þá verður for­rit­inu og öllum gögnum sem hafa safn­ast eytt að sögn Víðis. Ytri aðili mun þá koma að verk­efn­inu og meta öryggið

Fólk ræður því sjálft hvort það sæki og noti for­ritið en Víðir hvetur fólk til að nota for­ritið um leið og það verður gefið út. Hann reiknar með að hægt verið að taka for­ritið í notkun í næstu viku. Hann segir vís­inda­menn í far­alds­fræði hafa reiknað út að góður árangur í smitrakn­ingum muni nást ef að minnsta kosti 60% far­síma í land­inu nota for­ritið.