Margir Íslendingar hundfúlir með ferðagjöfina: „Algjört drasl“

Mikla óánægju má finna meðal fjölda Íslend­inga sem gert hafa til­raun til að hlaða niður snjall­símafor­riti Ferða­gjaf­ar­innar í far­sím­ana sína. Forritið er liður í því að ferða­langar geti ný sér fimm þús­und króna ferða­gjöf rík­is­stjórn­ar­innar til aðstoðar íslenskum ferða­þjón­ustu­að­ilum á Covid-tímum. Margir hafa skilið eftir skoðun sína á fyr­ir­komu­lag­inu í kommenta­kerfum, til dæmis í Play Store, og ljóst að mik­ill meiri­hluti þeirra sem þar tjáir sig er hund­fúll.

„Skíta­for­rit. Greini­lega hannað til að fólk gef­ist upp á að nýta sér það.“

Fjöl­margir þeirra sem hafa reynt að hlaða niður for­rit­inu segj­ast ýmist ekki geta það eða kvarta undan því að það virki ekki þrátt fyrir nið­ur­haln­ingu. Þá hefur Mannlíf fengið fjölda ábend­inga um að þjón­ustu­að­ilar hafi einnig lent í vand­ræðum með að taka við ferða­gjöf­inni vegna tækni­legra örð­ug­leika.

„Drasl. Er ekki hægt að hafa þetta í lagi? Virkar ekk­ert.“

Mannlíf hefur fengið sendar nokkrar reynslu­sögur Íslend­inga af notkun ferða­gjaf­ar­innar. Einn þeirra sem ætl­aði að nýta sér ferða­gjöf­ina á Subway á Akureyri lenti til að mynda í vand­ræðum. Fyrst við að hlaða gjöf­inni niður í sím­ann sinn en fékk að lokum aðstoð frá starfs­manni veit­inga­stað­ar­ins. Þegar það tókst loks­ins lenti starfs­mað­ur­inn í því að geta ekki tekið við gjöf­inni vegna tækni­legra örð­ug­leika og því gat við­skipta­vin­ur­inn, sem ekki vill láta nafn síns getið, ekki nýtt gjöf­ina til að greiða fyrir mál­tíð­ina. „Þetta var alveg hrika­lega fúlt og mjög óþæg­in­legar aðstæður að lenda í. Þetta var líka vand­ræða­legt fyrir starfs­mann­inn sem var allur að vilja gerður en þetta virk­aði allt bara svo illa að það var engin leið að nýta gjöf­ina,“ segir við­skipta­vin­ur­inn.

Breki Karlsson, for­maður Neyt­enda­sam­tak­anna, hefur orðið var við umræðu af þessum toga þar sem margir Íslend­ingar virð­ast eiga í vand­ræðum með að nýta gjöf stjórn­valda. Aðspurður segir hann þó erindið ekki komið form­lega inn á borð til sín. „Þetta hefur ekki komið form­lega inn á borð til okkar og engin ábend­ing borist okkur beint. Við höfum hins vegar heyrt af þess­ari óánægju og orðið hennar víða vör. Það er að sjálfögðu baga­legt að fólk geti ekki nýtt þessa gjöf, hvort sem það eru ein­stak­ling­arnir sjálfir eða fyr­ir­tæki að taka við gjöf­unum. Hvoru tveggja er for­senda þess að gjöfin virki eins og henni var ætlað,“ segir Breki.

Breki Karlsson, for­maður Neyt­enda­sam­tak­anna