Alma Geirdal lést í dag á líknardeild, 41 árs að aldri.
Banamein Ölmu var brjóstakrabbamein, sem hún greindist með aðeins 38 ára gömul. Eftir meðferð var hún krabbameinslaus í tæp tvö ár en þá greindist hún aftur og gaf meinið enga vægð. Alma var ætíð opinská með veikindi sín og hélt meðal annars úti hópi á Facebook, Alman vs. cancer, þar sem hún skrifaði nær daglega hugleiðingar sínar um veikindin og daglegt líf.
Alma lætur eftir sig sambýlismann, þrjú börn og tvö stjúpbörn.
Systir Ölmu, Sigurborg, greindi frá andláti Ölmu: „Hryggir okkur meira en orð fá lýst að láta ykkur vita að elsku yndislega Alman okkar lést í dag umvafin sínum nánustu.“
Alma var í viðtali hjá Mannlíf í byrjun árs, þar sem hún ræddi baráttuna, fordómana sem hún varð fyrir í heilbrigðiskerfinu og krabbameinslyfið sem olli miklum kvölum og aukaverkunum, en gerði henni ekkert gagn. Í viðtalinu kom fram að Alma var búin að fá uppgefinn tímann sem hún átti eftir, en hún var staðráðin í að njóta tímans sem eftir var sem best hún gat með sínum nánustu, sambýlismanni, börnum, systkinum og öðrum ættingjum og vinum.
Sjá einnig: „Mig langar ekki að deyja en ég verð að gera það með reisn“
Mannlíf vottar ástvinum Ölmu innilega samúð.
Athugasemdir