Íslendingar dást að Arnari – Óttast hefnd útgerðarinnar – „Gangi þér vel í vinnubanninu“

„Hef því miður trú á því að það eina sem kemur út úr þessu er að hann fer á svartan lista og fær ekki vinnu á sjó aftur.“ Þetta skrifar sjó­maður nokkur innan Facebook-hóps stétt­ar­inar, Sjómenn á Íslandi, um Arnar Hilm­ars­son, háseta á Júlíusi Geir­munds­syni. Hann rauf þögn­ina um hvað gerð­ist á skip­inu í við­tali á RÚV í gær og lýst hvernig útgerðin neyddi COVID-veika menn að vinna.

Viðhorf ónefnda sjó­manns­ins hér fyrir ofan er lýsandi fyrir við­brögð margra lands­manna eftir við­talið við Arnar. Hann er sagður nagli og hetja en margir ótt­ast að útgerðin hefni sín. Tvítuga hetjan fái ekki vinnu í bráð. Helgi Seljan frétta­maður er einn þeirra sem segir þetta við­horf sýna að eitt­hvað er skagt. Á Twitter skrifar hann:

„Orðu á þennan gæja. Ég held að fólk geri sér almennt ekki grein fyrir því hvað það eitt að stíga fram og tjá sig, er risa­vaxið skref fyrir gæja í hans stöðu. Að sama skapi er þögn ráða­manna fyr­ir­sjá­an­legri en flest. -Ertu eitt­hvað hræddur um að missa þína stöðu á skip­inu út af þessu? „Tjáning mín á mál­inu er óend­an­lega verð­mæt­ari en starf mitt þarna um borð.“ Þessi spurn­ing er mjög eðli­leg. Pælum samt aðeins í því?,“ segir Helgi.

Lands­mönnum virð­ist mörgum brugðið við lýs­ingar Arnars. Össur Skarp­héð­ins­son, fyrr­ver­andi ráð­herra, segir þetta það ógeðs­leg­asta síðan far­ald­ur­inn kom upp á Íslandi. „Þetta er það ótrú­leg­asta – og ógeðs­leg­asta – sem gerst hefur í Covid á Íslandi. Maður lifir í þeirri trú að Ísland sé – þrátt fyrir allt -betra en flest önnur sam­fé­lög. En að svona ger­ist í mínum gamla heimabæ er í senn sorg­legt – og ótrú­legt. – Sægreif­arnir halda áfram að auka orðstír sinn einsog eng­inn sé morg­un­dag­ur­inn,“ segir Össur.

Sam­flokks­kona hans, Helga Vala Helga­dóttir, segir nokkuð ljóst að lög hafi verið brotin. „Þetta er svaka­legt við­tal. Það er morg­un­ljóst að þetta er skýrt brot á sótt­varn­ar­lögum og sjó­manna­lögum og bara öllum rétt­indum þeirra sem þarna starfa eða störf­uðu. Tek ofan fyrir Arnari Hilm­ars­syni og dáist að hug­rekki hans. Nú þurfa stjórn­völd og að því mér sýn­ist ákæru­valdið að bregð­ast fum­laust við. Jafn­framt skora ég á stjórn­endur ann­arra útgerða að standa með þessum hug­rakka manni og bjóða honum pláss, ef hann kærir sig um eftir þessa erf­iðu reynslu,“ segir hún.

Egill Helgason fjöl­miðla­maður seg­ist ein­fald­lega taka hatt­inn ofan fyrir Arnari. „Ég tek hatt­inn ofan fyrir þessum unga háseta, Arnari Hilm­ars­syni, sem tjáði sig um atburð­ina um borð í Júlíusi Geir­munds­syni í kvöld­frettum RÚV og segir tján­ing sín um málið sé miklu verð­mæt­ari en starf sitt um borð í skip­inu,“ segir Egill.

Rit­höf­und­ur­inn Halldór Högurður segir hið sama og bætir í: „Tek ofan fyrir þess­ari hafs­ins hetju. Gangi þér vel í vinnu­bann­inu sem fylgir, það end­ist ævi­langt, þannig ger­ast kaupin á þræla­eyjum.“