Alma rannsakar Covid-hópsmitið á Landakoti sem kostaði 13 mannslíf

Alma Möller land­læknir hefur hafið rann­sókn á því hvað gerð­ist á Landa­koti sem kost­aði 13 Íslend­inga lífið vegna Covid-hópsmits sem kom þar upp. Áður hafði Land­spít­al­inn rann­sakað sjálfan sig og kennt mann­eklu og slæ­legum húsa­kosti um dauðs­föllin.

Svandís Svav­ars­dóttir heil­brigð­is­ráð­herra segir stjórn­endur Land­spít­ala bera ábyrgð­ina á Landa­koti. Það er ekki á ábyrgð heil­brigð­is­ráð­herra að stýra mönn­un inn­an heil­brigðis­kerf­is­ins né held­ur ber ráð­herra ábyrgð á starfs­um­hverfi starfs­fólks spít­al­ans. Ábyrgð­in sé alfarið stjórn­enda Land­spít­al­ans.

Nú hafa þrettán Íslend­ingar lát­ist vegna Landa­kotsveirunnar. Samtals hafa 26 lát­ist hér á landi vegna Covid og er helm­ingur alla lát­inna tengdir þessu alvar­lega hópsmiti. Landakot er hluti af Lands­spít­al­anum og undir stjórn hans. Sýk­ing­ingin hefur ekki verið til­kynnt til lög­reglu en starfs­manni spít­al­ans var falið að rann­saka það hvað fór úrskeiðis. Þegar er við­ur­kennt að Landa­koti var ekki skipt niður í sótt­varna­hólf. For­stjóri spít­al­ans sagði það vera vegna mann­eklu.

Mannlíf leit­aði svara hjá emb­ætti land­læknis um hvort þar á bæ væri hafin rann­sókn á því sem gerð­ist. Þar feng­ust þau svör að rann­sóknin væri hafin en hún væri stutt á veg komin. Að henni koma sér­fræð­ingar á sviði eft­ir­lits og heil­brigð­is­þjón­ustu og frá sótt­varna­sviði emb­ætt­is­ins, auk utan­að­kom­andi sér­fræð­ings. „Rann­sóknin er í for­gangi hjá emb­ætt­inu ásamt fleiri umfangs­miklum málum. Þó er ljóst að rann­sóknin muni taka a.m.k. nokkrar vikur héðan í frá. Hér og nú er því ekki hægt að segja til um hvenær nið­ur­stöður emb­ætt­is­ins liggja fyrir,“ segir Kjartan Hreinn Njálsson, upp­lýs­inga­full­trúi hjá Land­lækni, spurður út í hvenær sé áætlað að rann­sókn­inni ljúki. Hvort nið­ur­stöð­urnar verði birtar fékkst ekki upp­gefið.

Aðspurður hvort hann sjái fram á að rann­sókn máls­ins komi til með að enda í höndum lög­reglu á ein­hverjum tíma­punkti sagði Kjartan það ekki emb­ættis Land­læknis að meta eða segja til um það. Hvort emb­ættið telji að aðstand­endum þeirra sem lét­ust í hópsmit­inu hafi verið sýnd nægj­an­leg virð­ing með hreinni afsök­un­ar­beiðni vegna máls­ins hafði Kjartan þetta að segja. „Rannsókn emb­ætt­is­ins snýr að alvar­legu atviki á Landa­koti þar sem hópsmit kom upp og hvaða lær­dóm megi draga af því,“ segir Kjartan.