Trausti Eysteinsson, múrari og öndunarsérfræðingur, og Elísabet Guðmundsdóttir lýtalæknir lentu í klóm lögreglunnar fyrir helgi. Elísabet grét hástöfum við handtökuna og Trausti trompaðist.
Elísabet var stöðvuð af lögreglu þar sem hún var eftirlýst eftir að hafa ekki mætt í skýrslutöku. Bæði Elísabet og Trausti tóku samskiptin við lögregluna upp á myndband. Myndband Trausta má sjá hér. Þá var hús Elísabetar eggjað um helgina og henni hefur ítrekað verið hótað barsmíðum, nauðgunum og lífláti.
Trausti brjálaðist við lögreglumenn yfir handtöku Elísabetar sem honum þótti alltof harkaleg. „Það var bara verið að ráðast á manneskjuna og inn á hennar friðhelgi, alveg gríðarlega harkalega. Þeir byrjuðu að teygja sig bara inn í bíl, að mínu mati þarf að gefa manneskju og móður tíma til að jafna sig. Hvað þá fjórir fullvaxta karlmenn. Þetta var bara fáranlegt og án allrar virðingar. Þetta mun hafa eftirmála,“ segir Trausti í samtali við Mannlíf og bætir við:
„Hún er bara í taugaáfalli eftir handtökuna.“
Fyrir að hlýða ekki kvaðningu lögreglumanna var Elísabet handtekin á staðnum og brást hún ókvæða við. Það gerði Trausti líka. „Strákar, viljið þið gjöra svo vel. Þetta er kona mín og vinkona mín. Heyrðu, verið þið góðir við þessa konu, annars er mér að mæta,“ öskraði Trausti.
Athygli vekur að Trausti kallar Elísabetu konuna sína í samskiptum við lögregluna. Aðspurður um hvort þau eru í sambandi hafði hann þetta að segja: „Nei, við erum bara í vinasambandi. Ég er munkur þannig að ég er ekkert að fara í þannig.“
Þetta er ekki í fyrsta sinn sem Trausti reiðist en hann varð frægur á einu augabragði eftir að hann birti myndband af sér í Bónus þar sem hann streittist gegn grímuskyldu verslunarinnar. Hann taldi sig í kjölfarið lagðan í einelti í netheimum þrátt fyrir að hafa fullkomlega rétt fyrir sér. Í samtali við Mannlíf lagði hann áherslu að reiði sín beinist ekki gegn starfsfólki verslana og því bað hann starfsmenn Bónus afsökunar á hegðun sinni.
Athugasemdir