Ásatrúarfélagið hefur bæst í hóp margra sem setja sig upp á móti orðræðu kaþólsku kirkjunnar á Íslandi en í fyrradag var séra Jakob Rolland, kanslari kaþólsku kirkjunnar á Íslandi, í sviðljósinu vegna ummæla hans um samkynhneigða.

Sagði hann meðal annars að samkynhneigt fólk sé velkomið í kirkjuna en aðeins það sem ekki á í ástarsamböndum við samkynja fólk og að samkynhneigt fólk geti leitað aðstoðar presta kirkjunnar vilji það breyta líferni sínu.

„Það er það sem vantar mjög mikið í nútímaþjóðfélagi. Sá sem vill komast út úr slíku líferni fær enga aðstoð.”

„Goðar Ásatrúarfélagsins fordæma þau ummæli sem kanslari Kaþólsku kirkjunnar viðhafði um samkynhneigð og hinsegin fólk og hafa verið til umræðu í fjölmiðlum síðan í gær. Goðar félagsins lýsa furðu sinni á því að einstaklingur í forsvari fyrir trú- og lífsskoðunarfélag virðist telja sig hafinn yfir m.a. almenn hegningarlög. Með lögum skal land byggja. Fjölbreytileiki mannhafsins gerir samfélag okkar betra og það er laga- og siðferðisleg skylda þeirra sem þjónusta landsmenn að taka þeim eins og þeir eru og standa vörð um réttindi þeirra,“ segir í færslu félagsins á samfélagsmiðlum.