Ekki er hægt að fá upplýsingar um fatakaup starfsmanna Reykjavíkurborgar en þetta kemur fram í svörum borgarinnar við fyrirspurn Mannlífs.

Mannlíf sendi fyrirspurn í nóvember í fyrra þar sem óskað var eftir upplýsingum um hversu háum upphæðum hefði verið eytt í fatakaup á árinu og einnig var beðið um upplýsingar hvernig föt voru keypt og hvaðan þau voru keypt.

Þá var sömuleiðis beðið um samanburð ársins 2025 á kostnaði í fatakaupum við fimm ár þar á undan.

Í svari borgarinnar við þeirri fyrirspurn í nóvember var greint frá því að fyrirspurnin gæti verið flókin í vinnslu en hún yrði sett í gang, eins og það var orðað í svarinu.

Eftir ítrekun við fyrirspurninni í dag var greint frá því að ekki væri hægt að svara henni þar sem það væri of erfitt.

„Því miður er ekki hægt að útvega þessar upplýsingar,“ sagði Eva Bergþóra Guðbergsdóttir, samskiptastjóri Reykjavíkur, í tölvupósti til Mannlífs. „Kerfin okkar eru flókin og fatakaup eru ekki skráð nákvæmlega eða miðlægt þvert á starfsemi borgarinnar. Upplýsingar sem ekki eru til og kosta mikla vinnu starfsfólks falla ekki undir upplýsingalög.“