Íslenskur fjallaskáli hefur ratað á lista breska stórblaðsins The Guardian yfir tíu bestu fjallaskála Evrópu. Skálinn sem verður fyrir valinu er Breiðavík á Víknaslóðum á Austurlandi, en blaðið fer fögrum orðum um bæði skálann og stórbrotna náttúruna sem umlykur hann.
Í umfjöllun The Guardian eru tíu fjallaskálar víðs vegar um Evrópu teknir fyrir. Blaðamaðurinn Kevin Rushby segir góða fjallaskála meðal annars eiga að bjóða göngu- og fjallafólki skjól á afskekktum stöðum þar sem stórbrotið útsýni og náttúra eru í aðalhlutverki.
Breiðavík fær þar að vera í hópi skála á Spáni, Svíþjóð, Noregi, Slóvakíu, og Ítalíu og fleiri stöðum.
The Guardian bendir á að á Austurlandi sé að finna fjölda framúrskarandi fjallaskála og nefnir Breiðavík sérstaklega sem gott dæmi. Skálinn er nokkuð frábrugðinn mörgum hinna á listanum enda stendur hann við sjávarsíðuna en ekki hátt uppi í fjöllum.
Skálinn býður upp á hefðbundin svefnrými fyrir ferðalanga auk vel búins eldhúss. Það er þó fyrst og fremst staðsetningin sem heillar höfund greinarinnar. Svæðinu er lýst sem villtri og afskekktri strandlengju þar sem finna megi svartar eldfjallastrendur og yfirgefin þorp.
The Guardian vekur athygli á að Ferðafélag Íslands reki skála á tugum staða víðs vegar um landið og að þeir myndi mikilvægt net fyrir ferðafólk sem vill kanna íslenska náttúru fjarri þéttbýlinu.
Á listanum eru einnig óvenjulegir skálar á borð við Cabaña Verónica á Spáni, sem stendur í 2.325 metra hæð og var að hluta byggður úr gömlum byssuturni bandarísks herskips, og Låktatjåkko í Svíþjóð, rúmlega 160 kílómetrum norðan heimskautsbaugs.
Breiðavík er því í ansi góðum félagsskap á lista breska stórblaðsins.
