Mai Linnéa Julia Maria, eða Julia eins og hún er kölluð, listakonan á bakvið Frjáls Palestína vegginn á Skólavörðustíg, óskar eftir hjálp við að laga verkið, eftir að óprúttinn aðili spreyjaði yfir það í dag.

Listakonan birti myndskeið rétt í þessu þar sem hún stendur við verkið og segist hafa málað yfir hluta af skemmdarverkinu en vegna heilsuvanda sem hún glími nú við, hafi hún ekki þol í að laga meira og biður fólk um að hjálpa sér með þetta.

Í samtali við Mannlíf segir Julia að síðustu þrjú árin hafi hún marg oft þurft að laga verkið eftir skemmdarverk. Þá birti Julia myndband í ágúst þar sem hún spilaði upptöku frá karlmanni sem hótaði henni lífláti á ensku.

„Einhvern daginn munum við koma til Reykjavíkur og drepa þig, tíkin þín!“ er meðal þess sem maðurinn segir. Í myndskeiðinu tekur Julia það fram að hún sé ekki í sjálfsvígshugsunum og noti ekki fíkniefni en það er algeng aðferð hjá þeim sem óttast um líf sitt og vilja að fólk viti að það sé ekki í sjálfsvígshættu.