Það verður nóg um að vera hjá Byggðasafni Árnesinga í október en þar verður boðið upp á allt frá rollugerð úr íslenskri ull yfir í Grænlandsferð og safnarölt.
Safnið verður opið alla sunnudaga í október frá klukkan 13 til 17 og kostar ekkert inn. Gestir geta meðal annars kíkt í Húsið, Kirkjubæ, Eggjaskúrinn og Sjóminjasafnið.
Fjörið hefst sunnudaginn 4. október þegar Rollusmiðja verður haldin í fjárhúsi safnsins á Eyrarbakka. Þar geta gestir á öllum aldri spreytt sig á því að þæfa sínar eigin rollur – eða látið sköpunargleðina ráða og búið til einhverjar allt aðrar furðuverur úr íslenskri ull. Auður Ösp Gilsdóttir, hönnuður og starfsmaður safnsins, leiðir smiðjuna.
Grænland verður síðan í sviðsljósinu 18. október þegar Linda Ásdísardóttir safnafræðingur segir frá ævintýrum sínum sem sjálfboðaliði á minjasöfnum á Vestur- og Suður-Grænlandi. Erindið ber nafnið „Safnarúntur á Grænlandi“ og hefst klukkan 14 í Varðveisluhúsinu við Búðarstíg 22.
Októberdagskránni lýkur svo 25. október þegar Lýður Pálsson safnstjóri tekur gesti með sér í leiðsögn um nýlegar sýningar safnsins. Þar verður meðal annars litið við á sýningunum „Yfir beljandi fljót“, „Bjargvætturinn“ og „Bátar og býli“, auk þess sem kíkt verður í fjósið og Beitningaskúrinn.
