Sautján ára gamall Akureyringur varð yngsti rafvirki Íslandssögunnar þegar hann fékk afhent sveinsbréf sitt við hátíðlega athöfn í Menningarhúsinu Hofi á Akureyri á dögunum.
Ómar Magni Halldórsson, sem fæddist 14. nóvember 2008, var einn 19 rafvirkja sem fengu sveinsbréf afhent við athöfnina. Auk þeirra fengu fjórir rafeindavirkjar sveinsbréf. Meirihluti rafvirkjanna lauk námi við Verkmenntaskólann á Akureyri (VMA), sem og allir fjórir rafeindavirkjarnir.
Ómar Magni hóf nám í rafvirkjun við VMA haustið 2023, þá tæplega 15 ára gamall. Hann brautskráðist sem rafvirki síðastliðið vor og þreytti sveinspróf í faginu í júní, aðeins nokkrum dögum eftir brautskráninguna.
Meðan á náminu stóð vann Ómar Magni við rafvirkjun og safnaði markvisst þeim verkefnum sem þurfti að skrá í ferilbók. Hann býr á Svalbarðseyri en starfar hjá Rafeyri á Akureyri.
VMA segir að hann muni vera yngsti rafvirki sem fengið hefur afhent sveinsbréf hér á landi. Skólinn, í tilkynningu á heimasíðu sinni, óskar Ómari Magna til hamingju með árangurinn og nýtt Íslandsmet.
