Víðir Reynisson, þingmaður Samfylkingarinnar og fyrrverandi sviðsstjóri almannavarna hjá Ríkislögreglustjóra, telur brýnt að stjórnvöld hraði innleiðingu nýs viðvörunarkerfis sem geri kleift að senda skilaboð samtímis í alla farsíma landsmanna þegar hættuástand skapast.
Víðir ræddi málið undir liðnum störf þingsins á Alþingi í dag. Hann sagði miðlun réttra upplýsinga vera einn af lykilþáttum áfallaþols og þjóðaröryggis, enda væri mikilvægt að bæði almenningur og viðbragðsaðilar gætu brugðist hratt við þegar vá steðjar að.
„Réttar upplýsingar um stöðu mála er forsenda þess að þeir sem þurfa geti tekið réttar ákvarðanir og brugðist við eins og þörf krefur,“ sagði Víðir.
Hann benti á að upplýsingabæklingur almannavarna um viðbúnað einstaklinga og fjölskyldna vegna hamfara væri væntanlegur. Slíkur bæklingur væri góð byrjun en jafnframt þyrfti að tryggja að hægt væri að koma áríðandi upplýsingum hratt og örugglega til allra þegar á reyndi.
Víðir sagði að öll Norðurlöndin og mörg önnur Evrópuríki hefðu tekið upp kerfi sem gera yfirvöldum kleift að senda viðvaranir í alla farsíma samtímis, annaðhvort á afmörkuðum svæðum eða um heilt land. Við prófanir í Noregi hefðu slík skilaboð borist í alla síma landsins á örfáum sekúndum.
SMS kerfið getur valdið töfum
Hér á landi sé hins vegar enn stuðst við hefðbundið SMS kerfi. Víðir sagði það bagalegt þar sem skilaboðin fari í sömu biðröð og önnur SMS skilaboð. Mikil notkun kerfisins geti því jafnframt tafið boðun viðbragðsaðila þegar mest liggur við.
Hann nefndi sem dæmi eldgosið í Holuhrauni þegar senda þurfti viðvörun vegna gasmengunar í Eyjafirði. Að sögn Víðis tók þá um 45 mínútur að koma viðvöruninni til íbúa.
„Nýtt kerfi sem sendir boð á alla síma á sama tíma er því mikilvægt og nauðsynlegt verkefni sem hraða þarf í nafni þjóðaröryggis,“ sagði Víðir.
Hann telur því mikilvægt að stjórnvöld hraði uppbyggingu slíks kerfis svo hægt verði að koma viðvörunum til almennings hratt og örugglega þegar hættuástand skapast.
