Brasilískur múrari seldi eigur sínar og ferðaðist meira en 1.900 kílómetra í þeirri von að hitta konu sem hann taldi mögulega verða eiginkonu sína. Þegar á áfangastað var komið reyndist konan hins vegar vera persóna búin til með gervigreind.

Edimar Rocha Martins, 49 ára, frá Imperatriz í Maranhão-fylki, rakst á TikTok-reikning konu sem kallaði sig Jéssica Oliveira. Reikningurinn var með yfir 300 þúsund fylgjendur og sýndi myndbönd af konu sem sagðist búa á sveitabýli og leita að maka.

Í myndböndunum sagðist konan meðal annars tilbúin að sjá fjárhagslega fyrir verðandi maka sínum og bjóða honum að flytja á býlið.

Martins tók boðinu alvarlega. Þann 9. október seldi hann eigur sínar til að fjármagna rútuferð til Belo Horizonte, rúmlega 1.900 kílómetra frá heimabæ hans. Þar ætlaði hann að hitta konuna.

Eftir komuna leitaði Martins að henni með ljósmyndir úr myndböndunum en án árangurs. Hann leitaði að lokum aðstoðar hjá útvarpsstöð og komst þá að því að konan væri ekki raunveruleg.

Umsjónarmaður TikTok-reikningsins staðfesti síðar að persónan væri búin til með gervigreind og sagði tilgang reikningsins hafa verið að afla athygli. Hann neitaði jafnframt að hafa átt bein samskipti við Martins.

Martins var peningalaus eftir ferðalagið en félagsþjónusta Belo Horizonte aðstoðaði hann við að komast aftur heim á leið.