Náttúruverndarstofnun stefnir á friðlýsingu Hjálpleysu í Skriðdal í samstarfi við umhverfis-, orku- og loftslagsráðuneytið, Múlaþing og landeigendur svæðisins.
Fyrirhuguð friðlýsing nær til Hjálpleysu og nærliggjandi vatnasviðs Gilsár á Völlum, alls um 26 ferkílómetra svæðis. Áformin eru unnin að ósk landeigenda.
Samkvæmt mati Náttúrufræðistofnunar hefur svæðið hátt verndargildi. Jarðfræði þess þykir sérstæð og tengist Þingmúlaeldstöðinni, kulnaðri megineldstöð sem hefur mikilvæga þýðingu í sögu jarðvísinda. Þar er meðal annars að finna fjölbreyttar jarðmyndanir, litskrúðugt landslag, líparítáreyrar og Hjálpleysuhóla.
Þrír friðlýsingarflokkar koma til skoðunar, landslagsverndarsvæði, óbyggð víðerni og náttúruvætti. Endanleg ákvörðun um flokkun og afmörkun svæðisins verður tekin síðar í undirbúningsferlinu.
