Starfsfólk Heilbrigðisstofnunar Austurlands (HSA) hefur þurft að fresta endurkomu til starfa eftir fæðingarorlof vegna skorts á leikskólaplássum í Múlaþingi. Þá hefur sumt starfsfólk tímabundið minnkað starfshlutfall sitt, samkvæmt Austurfrétt.

Fjölskylduráð Múlaþings hafnaði í síðustu viku beiðni um að starfsfólk HSA fengi forgang að leikskólaplássum. Mannekla er mikil á leikskólum sveitarfélagsins, einkum á Egilsstöðum, en einnig hjá HSA.

Í síðasta mánuði óskaði rekstrarstjórn HSA eftir því við sveitarfélagið að starfsfólk stofnunarinnar fengi forgang að leikskólaplássum. Markmiðið var að koma í veg fyrir að skortur á leikskólaplássum yki enn frekar á mönnunarvanda í heilbrigðisþjónustu á Austurlandi.

Þórarna Gró Friðjónsdóttir segir ákvörðun fjölskylduráðs hafa neikvæð áhrif á starfsemi stofnunarinnar.

„Þetta hefur þau áhrif að starfsfólk hefur tímabundið minnkað við sig starfshlutfall og sumir hafa þurft að fresta endurkomu til starfa eftir fæðingarorlof,“ segir hún.

Hún bætir við að þetta auki þörfina fyrir afleysingafólk og geti haft áhrif á framboð tíma ef ekki tekst að tryggja nægilega mönnun.