Stjórn Samtaka um bíllausan lífsstíl kallar eftir auknum aðgerðum til að tryggja öryggi barna í umferðinni og segir að ábyrgðin megi ekki fyrst og fremst hvíla á börnunum sjálfum.
Þetta kemur fram í aðsendri grein sem birtist á Vísi. Höfundar hennar eru Albína Pálsdóttir, Anna Margrét Ásbjarnardóttir, Brynhildur Bolladóttir, Geir Finnsson, Gísli Marteinn Baldursson, Halldóra Þórsdóttir, Hrafnhildur Ingibjargardóttir Hallsdóttir, Kjartan Sveinn Guðmundsson, Rán Flygenring, Sveinn Þórhallsson og Viktor Lorange. Þau eiga öll sæti í stjórn Samtaka um bíllausan lífsstíl.
Tilefni greinarinnar er meðal annars að ekið var á átta ára dreng í Mosfellsbæ. Drengurinn hlaut höfuðáverka og blóðnasir en ökumaðurinn ók af vettvangi. Höfundarnir vísa einnig til þess að ekið hafi verið á fimm ára barn í Hveragerði og þriggja ákeyrslna á börn við Laugarnesskóla síðasta haust.
„Hvers vegna er ekki meiri reiði yfir þessu? Hvernig stendur á því að ítrekaðar fréttir af ákeyrslum á börn virðast vart raska ró okkar?“ spyrja höfundarnir.
Þau segjast við lauslega yfirferð íslenskra fjölmiðla hafa fundið frásagnir af að minnsta kosti 22 börnum sem ekið hafi verið á hér á landi undanfarin tvö ár. Þau telja jafnframt líklegt að tilfellin séu fleiri þar sem aðeins sé um þau atvik að ræða sem rötuðu í fjölmiðla.
Höfundarnir gagnrýna að mikil áhersla sé lögð á að börn gæti sín sjálf í umferðinni með hjálmum, endurskinsmerkjum og stöðugri árvekni. Á sama tíma þurfi að gera ríkari kröfur til ökumanna og þeirra sem bera ábyrgð á skipulagi gatna.
„Börn eru óútreiknanleg. Þau hlaupa, leika sér, gleyma sér og gera mistök. Það er hluti af því að vera barn,“ skrifa þau og segja það vera hlutverk fullorðinna að skapa börnum öruggt umhverfi.
Þá benda þau á að 55 börn á aldrinum 0 til 14 ára hafi slasast sem gangandi eða hjólandi vegfarendur árið 2025 samkvæmt slysaskýrslu Samgöngustofu.
Samtökin kalla eftir öflugra hraðaeftirliti, öruggari götum, betri tölfræði og markvissari fræðslu til ökumanna.
„Það er kominn tími til að hætta að ætlast til þess að börnin lagi sig að hættulegri umferð og krefjast þess í stað að umferðin lagi sig að börnunum,“ segja höfundarnir.
