Ungur maður frá Akureyri hefur verið dæmdur í 90 daga skilorðsbundið fangelsi fyrir fíkniefnalagabrot og peningaþvætti auk þess sem hann var sektaður fyrir akstur undir áhrifum fíkniefna og hraðakstur. Dómur féll í Héraðsdómi Norðurlands vestra 7. október.

Málið á rætur að rekja til 9. mars 2025 þegar maðurinn, sem er fæddur árið 2004, var stöðvaður við akstur. Hann ók á 109 kílómetra hraða þar sem hámarkshraði var 90 kílómetrar á klukkustund. Í blóðsýni hans mældist jafnframt tetrahýdrókannabínól, THC.

Við rannsókn málsins kom í ljós að maðurinn hafði í vörslum sínum töluvert magn fíkniefna sem ætluð voru til sölu og dreifingar. Um var að ræða tæplega 176 grömm af kannabisblönduðu efni, tíu MDMA töflur, 8,75 grömm af maríhúana og fjögur hylki með kannabisblönduðum vökva.

Hann var einnig sakfelldur fyrir peningaþvætti. Samkvæmt ákæru hafði hann frá september 2024 fram í mars 2025 aflað sér og geymt rúmlega 1,5 milljónir króna í ágóða af fíkniefnasölu. Lögregla lagði hald á 245 þúsund krónur í bifreið hans.

Maðurinn játaði brotin skýlaust. Við ákvörðun refsingar var meðal annars horft til ungs aldurs hans og játningar, en jafnframt til þess að magn fíkniefnanna var umtalsvert.

Fangelsisrefsingin er skilorðsbundin í tvö ár. Þá var maðurinn sektaður um 150 þúsund krónur og sviptur ökuréttindum í sex mánuði.

Fíkniefnin og 245 þúsund krónurnar voru gerð upptæk. Þá þarf maðurinn að greiða tæplega 550 þúsund krónur í sakarkostnað.