Rekstrarfélag Minigarðsins í Skútuvogi, Munnbitinn ehf., tapaði 45 milljónum króna á síðasta ári. Tapið jókst verulega frá árinu 2024 þegar það nam 20 milljónum króna en Viðskiptablaðið greinir frá þessu.
Tekjur félagsins námu 484 milljónum króna árið 2025 og drógust saman um 26 milljónir, eða 5,1 prósent, milli ára. Rekstrargjöld námu 487 milljónum.
Eignir Munnbitans námu 226 milljónum króna í árslok. Skuldir félagsins voru hins vegar 267 milljónir króna. Eigið fé var neikvætt um 42 milljónir króna.
Munnbitinn rekur Minigarðinn, þar sem starfræktur er minigolfvöllur og veitingarekstur í Skútuvogi. Sigmar Vilhjálmsson athafnamaður er meirihlutaeigandi félagsins og í forsvari fyrir reksturinn.
Félagið kemur einnig fyrir í hagsmunaskrá Kristrúnar Frostadóttur forsætisráðherra. Samkvæmt skriflegu svari aðstoðarmanns hennar til Heimildarinnar í fyrra er 9,59 prósenta hlutur í Munnbitanum í eigu eiginmanns forsætisráðherra. Eignarhluturinn er einn þriggja fyrirtækjatengdra hagsmuna sem þar eru skráðir vegna eigna eiginmanns hennar.
